മതസൗഹാർദ്ദത്തിന്റെ അത്ഭുതങ്ങളും ഐതിഹ്യങ്ങളും ഉറങ്ങുന്ന ആറ്റിൻകര പള്ളി

തിരുനെൽവേലി: പശ്ചിമഘട്ടത്തിൽ നിന്ന് ഉത്ഭവിച്ചൊഴുകുന്ന നമ്പിയാർ പുഴ അറബിക്കടലിൽ പതിക്കുന്ന തീരത്ത്, ആത്മീയതയുടെയും മാനവ സൗഹാർദ്ദത്തിന്റെയും പ്രകാശഗോപുരമായി നിലകൊള്ളുകയാണ് ആറ്റിൻകര പള്ളിവാസൽ. തിരുനെൽവേലി ജില്ലയിലെ രാധാപുരം താലൂക്കിൽ ദിശയൻവിളയ്ക്ക് സമീപമുള്ള ഈ ചരിത്രപ്രസിദ്ധമായ ദർഗ, ജാതിമത ഭേദമന്യേ ആയിരക്കണക്കിന് തീർത്ഥാടകർക്ക് ഇന്നും ആശ്വാസകേന്ദ്രമാണ്.​സൂഫി വര്യനായ ഹസ്രത്ത് ഷെയ്ഖ് മുഹമ്മദ് ഒലിയുള്ള (റ), അദ്ദേഹത്തിന്റെ ധർമ്മപത്നി ഹസ്രത്ത് സെയ്തലി ഫാത്തിമ ബീവി (റ) എന്നിവരുടെ മഖാമുകളാണ് ഇവിടെ സ്ഥിതിചെയ്യുന്നത്. നാടിന് തണലായി നദീതീരത്ത് വാണരുളുന്നതിനാൽ സെയ്തലി ഫാത്തിമ ബീവിയെ ഭക്തർ സ്നേഹാദരങ്ങളോടെ ‘ആത്തങ്കര നാച്ചിയാർ അമ്മ’ (ആറ്റങ്കരയുടെ അധിനായിക) എന്ന് വിളിക്കുന്നു.

500 വർഷത്തെ ചരിത്രവും ഐതിഹ്യവും

ഏകദേശം അഞ്ചു നൂറ്റാണ്ടുകൾക്ക് മുൻപ് അറേബ്യയിലെ ‘ബജ്ജാൽ’ എന്ന സ്ഥലത്തുനിന്നാണ് ഷെയ്ഖ് മുഹമ്മദ് ഒലിയുള്ളയും സെയ്തലി ഫാത്തിമ ബീവിയും അനുയായികളും ഇസ്‌ലാമിക പ്രബോധനാർത്ഥം ഭാരതത്തിലേക്ക് കപ്പൽ മാർഗ്ഗം തിരിച്ചത്. എന്നാൽ ശക്തമായ കടൽക്ഷോഭത്തിൽപ്പെട്ട് തമിഴ്‌നാടിന്റെ തെക്കൻ തീരത്തടിഞ്ഞ ഇരുവരും പിന്നീട് ഈ പ്രദേശത്ത് തങ്ങി ജനസേവനത്തിലും പ്രാർത്ഥനകളിലും മുഴുകുകയായിരുന്നു.​കേരളത്തിലെ കൊടുങ്ങല്ലൂരിൽ നിന്ന് തിരുവനന്തപുരം വഴിയാണ് സെയ്തലി ഫാത്തിമ തമിഴ്‌നാട്ടിലേക്ക് എത്തിയത് എന്നാണ് വിശ്വസിക്കപ്പെടുന്നത്. അഞ്ച് സഹോദരിമാരിൽ രണ്ടാമത്തെയാളാണ് സെയ്തലി ഫാത്തിമ. തിരുവനന്തപുരത്തെ പ്രസിദ്ധമായ ഭീമാപള്ളിയിലെ ഭീമാ ബീവി മൂത്ത സഹോദരിയാണ്. ദിശയൻവിളയ്ക്ക് അടുത്തുള്ള ആലങ്കുളത്തുള്ള ചിന്നപ്പിള്ള നാച്ചിയാർ അമ്മളാണ് മൂന്നാമത്തെയാൾ. മറ്റു രണ്ടു സഹോദരിമാരുടെ മഖാമുകൾ ഗുജറാത്തിലും മഹാരാഷ്ട്രയിലുമാണ്.

വെയിലും മഴയുമേൽക്കുന്ന മഖാമുകൾ

ഷെയ്ഖ് മുഹമ്മദ് ഒലിയുള്ളയുടെ വേർപാടിനു ശേഷവും പ്രാർത്ഥനകളുമായി അവിടെക്കഴിഞ്ഞ ഫാത്തിമ ബീവിയെ, അവരുടെ വഫാത്തിന് ശേഷം ഭർത്താവിന്റെ ഖബറിന് തൊട്ടടുത്തുതന്നെ അടക്കം ചെയ്തു. തുടന്ന് വിശ്വാസികൾക്ക് ഉണ്ടായ സ്വപ്നദർശനത്തിൽ, തങ്ങളുടെ ഖബറുകൾക്ക് മുകളിൽ മേൽക്കൂര (Roof) പണിയരുതെന്നും സൂര്യപ്രകാശവും മഴയും കാറ്റും നേരിട്ട് പതിക്കുന്ന രീതിയിൽ തുറന്നിടണമെന്നും ബീവി ആവശ്യപ്പെടുകയായിരുന്നു. അതിനാൽ ഇന്നും വെയിലും മഴയുമേൽക്കുന്ന രീതിയിലാണ് മഖ്ബറ നിലനിർത്തിയിരിക്കുന്നത്. ദർഗ നിർമ്മാണ സമയത്ത് താഴേക്ക് പതിക്കാൻ തുനിഞ്ഞ ഒരു വലിയ പാറക്കെട്ട് ഭക്തരുടെ വിളികേട്ട് അന്തരീക്ഷത്തിൽ അനങ്ങാതെ ഉറച്ചുനിന്നു എന്ന അത്ഭുത സംഭവവും ഇവിടുത്തെ ഐതിഹ്യങ്ങളിൽ ഒന്നാണ്.

മതസൗഹാർദ്ദത്തിന്റെ അപൂർവ്വ മാതൃക

എല്ലാ വർഷവും ഫെബ്രുവരി മാസത്തിൽ നടക്കുന്ന ‘കന്തൂരി ആഘോഷവും’ (ചന്ദനക്കൂട് നേർച്ച) വാർഷിക ഉറൂസുമാണ് ഇവിടുത്തെ പ്രധാന ഉത്സവങ്ങൾ. ഉത്സവത്തിന്റെ കൊടിയേറ്റ സമയത്ത് പള്ളിവാസൽ ട്രസ്റ്റികളുടെ ഗ്രാമമായ അരൺമന പുലിമാൻ കുളത്തിൽ നിന്ന് ആനപ്പുറത്താണ് ചന്ദനക്കുടവും കൊടിയും എഴുന്നള്ളിക്കുന്നത്.​രാജാക്കന്മാരെപ്പോലെ തലയിൽ കിരീടവും പരമ്പരാഗത വസ്ത്രങ്ങളും ധരിച്ച് കൊടിയേറ്റത്തിന് എത്തുന്ന ട്രസ്റ്റികൾ, പള്ളിവാസൽ നിൽക്കുന്ന സ്ഥലത്തിന്റെ ആദ്യ ഉടമസ്ഥനായിരുന്ന രാമൻകുടി മുത്തു കൃഷ്ണപുരം അരുണാചല നാടാരുടെ വീട്ടിലെത്തി സ്വീകരണവും കാണിക്കകളും സ്വീകരിക്കുന്നു. പള്ളിവാസൽ നിലവിൽ വന്ന കാലം മുതൽ ഇന്നും തുടരുന്ന ഈ ആചാരത്തിന് നിലവിൽ അരുണാചല നാടാരുടെ പേരമകൻ അരുൾദുരൈ ആണ് നേതൃത്വം നൽകുന്നത്.

മാറാത്ത ഭക്തി, തുടരുന്ന പരമ്പര

വിവിധ രോഗങ്ങളാൽ ബുദ്ധിമുട്ടുന്നവരും ദുഷ്ടശക്തികളുടെ ഉപദ്രവം അനുഭവിക്കുന്നവരുമായ നിരവധിയാളുകൾ ഇവിടെ വന്ന് താമസിച്ച് രോഗശാന്തി നേടി മടങ്ങുന്നു. ഇവിടെ എത്തുന്ന മുഴുവൻ ഭക്തജനങ്ങൾക്കും നൽകുന്ന അന്നദാനവും (നേർച്ചച്ചോറ്) പ്രശസ്തമാണ്.​ആത്തങ്കര നാച്ചിയാർ അമ്മയോടുള്ള അതിരറ്റ ഭക്തി കാരണം പ്രദേശവാസികൾ തങ്ങളുടെ പെൺകുട്ടികൾക്ക് ‘സെയ്തലി ഫാത്തിമ’ എന്ന് പേരിടുന്നത് തലമുറകളായി തുടരുന്ന കാഴ്ചയാണ്. കൂടാതെ പ്രദേശത്തെ കടകളിലും വീടുകളിലും ആത്തങ്കര പള്ളിവാസലിന്റെ ചിത്രം സൂക്ഷിക്കുന്നതും പതിവാണ്. ഉത്സവനാളുകളിൽ തമിഴ്‌നാട് സ്റ്റേറ്റ് ട്രാൻസ്പോർട്ട് കോർപ്പറേഷൻ (TNSTC) വിവിധ ഭാഗങ്ങളിൽ നിന്ന് പ്രത്യേക ബസ് സർവീസുകളും നടത്താറുണ്ട്. കേരളത്തിൽ നിന്നും, പ്രത്യേകിച്ച് തിരുവനന്തപുരം, കൊല്ലം ജില്ലയിൽ നിന്നും പതിനായിരക്കണക്കിന് തീർത്ഥാടകരാണ് ദിനംപ്രതി ഈ പുണ്യഭൂമിയിലേക്ക് ഒഴുകിയെത്തുന്നത്.

Saju . s Neyyattinkara