തലസ്ഥാനത്ത് വീണ്ടും മ്യൂസിയത്തിന് സമീപം യുവതിക്കു നേരെ ആക്രമണം : പ്രതി പിടിയിൽ
തിരുവനന്തപുരം: നഗരത്തില്‍ രാത്രി ഫുട്‌ബോള്‍ മത്സരം കണ്ട ശേഷം സുഹൃത്തിനൊപ്പം സൈക്കിളില്‍ മടങ്ങുകയായിരുന്ന യുവതിക്കു നേരെ ആക്രമണം, പ്രതി പിടിയില്‍. ചൊവ്വ രാത്രി 11 മണിയോടെ കനകക്കുന്നിനു സമീപമാണ് ആക്രമണമുണ്ടായത്. പ്രതി വിളവൂര്‍ക്കല്‍ കുരിശുമുട്ടം കെ.വി.നഗറില്‍ എം.മനുവിനെ (29) മ്യൂസിയം പൊലീസ് അറസ്റ്റ് ചെയ്തു.സംഭവത്തെക്കുറിച്ച് പൊലീസ് പറയുന്നത്: നന്തന്‍കോട് ക്ലിഫ് ഹൗസിനു സമീപത്തെ ടര്‍ഫില്‍ ഫുട്‌ബോള്‍ കളി കണ്ട് മടങ്ങുകയായിരുന്നു യുവതി. സുഹൃത്ത് ഓടിച്ച സൈക്കിളിനു പിന്നിലിരുന്ന് യാത്ര ചെയ്ത യുവതിയെ പിന്നാലെ ബൈക്കിലെത്തിയ മനു ആക്രമിക്കുകയായിരുന്നു. കനകക്കുന്ന് പ്രധാന ഗേറ്റിന് എതിര്‍വശമെത്തിയപ്പോള്‍ പ്രതി യുവതിയെ കയറിപ്പിടിക്കുകയും മര്‍ദിക്കുകയും ചെയ്തു. തുടര്‍ന്ന് ബൈക്ക് നിര്‍ത്താതെ ഓടിച്ചു പോയി.യുവതിയുടെ പരാതിയുടെ അടിസ്ഥാനത്തില്‍ ഇന്നലെ രാവിലെ കേസെടുത്ത പൊലീസ്, വാഹനത്തിന്റെ നമ്പര്‍ കണ്ടെത്തിയിരുന്നു. തുടര്‍ന്നു സിസി ടിവി ദൃശ്യങ്ങള്‍ പരിശോധിച്ചാണ് പെയിന്റിങ് തൊഴിലാളിയായ മനു ആണ് പ്രതിയെന്നു തിരിച്ചറിഞ്ഞത്.
