ഒറിജിനലിനെ വെല്ലുന്ന വ്യാജ സ്വർണ ഉരുപ്പടികൾ നിർമ്മിച്ചു നൽകുന്ന സംഘത്തിലെ പ്രധാനികൾ പിടിയിൽ

ഇടുക്കി : ഒറിജിനലിനെ വെല്ലുന്ന വ്യാജ സ്വർണ ഉരുപ്പടികൾ നിർമ്മിച്ചു നൽകുന്ന സംഘത്തിലെ പ്രധാനികൾ പിടിയിൽ . മൂവാറ്റുപുഴ പേഴക്കാപ്പിള്ളി പുത്തൻവീട്ടിൽ കുട്ടപ്പൻ (60), കോതമംഗലം ചേലാട് കരിങ്ങഴ വെട്ടുപറമ്പിൽ റെജി (51) എന്നിവരെയാണ് കട്ടപ്പന ഡിവൈഎസ്പിയുടെ നേതൃത്വത്തിലുള്ള പ്രത്യേക അന്വേഷണസംഘം പിടികൂടിയത്.കേസിൽ മുഖ്യപ്രതിയായ കുട്ടപ്പാണ് മുക്കുപണ്ടം വച്ച് ലക്ഷങ്ങൾ തട്ടിയ കേസിലെ പ്രധാന പ്രതി. റെജിയാണ് കുട്ടപ്പന് വ്യാജ ആഭരണങ്ങൾ നിർമ്മിച്ചു നൽകിയിരുന്നതെന്ന് അന്വേഷണസംഘം അറിയിച്ചു. കുട്ടപ്പന്റെയും റെജിയുടെയും പേരിൽ സംസ്ഥാനത്തെ വിവിധ സ്റ്റേഷനുകളിൽ മുക്കുപണ്ടം പണയം വച്ച് തട്ടിപ്പ് നടത്തിയെന്ന് കേസുകളുണ്ടെന്നും കുട്ടപ്പൻ വാഹന മോഷണക്കേസിലും പ്രതിയാണെന്ന് പോലീസ് പറഞ്ഞു.