ഫെബ്രുവരി 16 ന് ഭാരത് ബന്ദിന് കർഷകസംഘടനകൾ ആഹ്വാനം ചെയ്തു
ന്യൂഡല്‍ഹി: ഫെബ്രുവരി 16-ന് ഭാരത് ബന്ദിന് ആഹ്വാനം ചെയ്ത് കര്‍ഷക സംഘടനകള്‍. കാര്‍ഷിക വിളകള്‍ക്ക് മിനിമം താങ്ങുവില ഉറപ്പാക്കുന്ന നിയമം നടപ്പാക്കാത്തതടക്കം വിവിധ വിഷയങ്ങള്‍ ചൂണ്ടിക്കാട്ടിയാണ് ബന്ദ് നടത്തുന്നതെന്ന് ഭാരതീയ കിസാന്‍ യൂണിയന്‍ നേതാവ് രാകേഷ് ടിക്കായത്ത് പറഞ്ഞു. കര്‍ഷക സംഘടനകളെ കൂടാതെ വ്യാപാരികളുടെയും വാഹന ഉടമകളുടെയും പിന്തുണ തേടിയിട്ടുണ്ടെന്നും അദ്ദേഹം പറഞ്ഞു.സംയുക്ത കിസാന്‍ മോര്‍ച്ച അടക്കം നിരവധി കര്‍ഷക സംഘടനകള്‍ സമരത്തിന്റെ ഭാഗമാകുമെന്ന് ടിക്കായത്ത് അവകാശപ്പെട്ടു. കര്‍ഷക സമരം മാത്രമായി ബന്ദ് ഒതുങ്ങില്ല. ബന്ദിന്റെ ഭാഗമായി കര്‍ഷകര്‍ കൃഷിയിടങ്ങളില്‍ പോകാതെ ജോലി ബഹിഷ്‌കരിക്കും. അന്നേ ദിവസം ജനങ്ങള്‍ കടകളില്‍ നിന്ന് സാധനങ്ങള്‍ വാങ്ങരുതെന്നും അദ്ദേഹം അഭ്യര്‍ഥിച്ചു.നേരത്തെ, അമാവാസി ദിനത്തില്‍ കര്‍ഷകര്‍ ജോലിക്കിറങ്ങിയിരുന്നില്ല. സമാനമായ രീതിയില്‍ ഫെബ്രുവരി 16 കര്‍ഷകരുടെ മാത്രം അമാവാസിയായിരിക്കും. അന്ന് ജോലി ബഹിഷ്‌കരിച്ചുകൊണ്ട് കര്‍ഷകര്‍ ബന്ദിന് പിന്തുണ പ്രഖ്യാപിക്കുന്നതുവഴി രാജ്യത്തിന് വലിയ സന്ദേശം നല്‍കണമെന്നും അദ്ദേഹം ആഹ്വാനംചെയ്തു.
