വൻ മയക്കുമരുന്ന് ശേഖരവുമായി രണ്ടു ഇൻഡ്യക്കാരെ ട്രാഫിക് പൊലീസ് അറസ്റ്റ് ചെയ്തു

സഊദി അറേബ്യ : വൻ മയക്കുമരുന്ന് ശേഖരവുമായി രണ്ടു ഇൻഡ്യക്കാരെ ട്രാഫിക് പൊലീസ് അറസ്റ്റ് ചെയ്തു. അസീറിൽ നിന്നാണ് പ്രതികളെ പിടികൂടിയത്. മയക്കുമരുന്ന് വിതരണ മേഖലയിൽ പ്രവർത്തിച്ചിരുന്ന സംഘത്തിൽ പെട്ടവരെയാണ് അറസ്റ്റ് ചെയ്തതെന്നാണ് റിപോർട്, സംഘത്തിന്റെ പക്കൽ നിന്ന് 126 കിലോ മയക്കുമരുന്നാണ് പിടികൂടിയതെന്ന് ഉദ്യോഗസ്ഥർ അറിയിച്ചു.തുടർന്നുള്ള നിയമ നടപടികൾക്കായി പ്രതികളെ പിന്നീട് ബന്ധപ്പെട്ട വകുപ്പിന് കൈമാറി. ലഹരിമരുന്ന് കടത്ത്, മയക്കുമരുന്ന് വിതരണം തുടങ്ങിയ മേഖലയിൽ പ്രവർത്തിക്കുന്നവരെ കുറിച്ച് മക്ക, റിയാദ്, കിഴക്കൻ പ്രവിശ്യകളിൽ 911 എന്ന നമ്പറിലും മറ്റു പ്രവിശ്യകളിൽ 999 എന്ന നമ്പറിലും ബന്ധപ്പെട്ട അധികൃതരെ അറിയിക്കണമെന്ന് പൊലീസ് നിർദേശിച്ചു.995 എന്ന നമ്പറിലും ഇ-മെയിൽ വഴിയും ജെനറൽ ഡയറക്ടറേറ്റ് ഓഫ് നാർകോടിക്സ് കൺട്രോളിൽ ബന്ധപ്പെട്ടും ലഹരിമരുന്ന് പ്രതികളെ കുറിച്ച് അധികാരികളെ അറിയിക്കാവുന്നതാണ്. മയക്കുമരുന്നുമായി ബന്ധപ്പെട്ട് പ്രവർത്തിക്കുന്നവരെ കുറിച്ച് നൽകുന്ന വിവരങ്ങൾ രഹസ്യമായി കൈകാര്യം ചെയ്യുമെന്നും സുരക്ഷാ വകുപ്പുകൾ വ്യക്തമാക്കി.