പെണ്‍കുട്ടിയെ കുടുംബം തടഞ്ഞു വച്ചെന്ന പരാതിയില്‍ പൊലീസ് കേസ് എടുത്തു
ലെസ്ബിയന്‍ പങ്കാളിക്കൊപ്പം പോകാന്‍ തയാറായ പെണ്‍കുട്ടിയെ കുടുംബം തടഞ്ഞു വച്ചെന്ന പരാതിയില്‍ പൊലീസ് കേസ് എടുത്തു. മലപ്പുറം കൊണ്ടോട്ടി സ്വദേശി ഹഫീഫയെ കുടുംബം വുമണ്‍ പ്രൊട്ടക്ഷന്‍ ഓഫീസറുടെ മുന്നില്‍ വച്ച് ബലം പ്രയോഗിച്ച് കൊണ്ടു പോകുന്ന ദൃശ്യങ്ങള്‍ പുറത്തു വന്നിരുന്നു.ഹഫീഫയുടെ പങ്കാളി മലപ്പുറം സ്വദേശി സുമയ്യ ഷരീഫിന്റെ കൂടി പരാതിയിലാണ് വണ്‍ സ്റ്റോപ്പ് സെന്ററില്‍ നിന്നുളളവരും മറ്റു സംഘടനകളും എത്തിയത്. ഇവര്‍ക്കാപ്പം പങ്കാളിയെ കാണാനായി ഹഫീഫ കാറില്‍ കയറുന്നത് കുടുംബം തടഞ്ഞുവെന്നതിന്റെ ദൃശ്യങ്ങള്‍ ഉള്‍പ്പെടുത്തിയാണ് പൊലീസില്‍ പരാതി നല്‍കിയത്.കൊണ്ടോട്ടി പൊലീസ് ഹഫീഫയുടെ കുടുംബത്തോട് ഹാജരാകാന്‍ നിര്‍ദേശം നല്‍കിയിട്ടുണ്ട്. ഹഫീഫയെ കുടുംബം തടഞ്ഞ് വച്ചിരിക്കുകയാണന്ന് ആരോപിച്ച് സുമയ്യ ഷരീഫ് ഹേബിയര്‍ കോര്‍പ്പസ് ഹര്‍ജി നല്‍കിയിരുന്നു.വിരമിച്ച ഒരു പൊലീസ് ഉദ്യോഗസ്ഥന്റെ പിന്തുണയോടെയാണ് തടവില്‍ വച്ചതെന്നും പരാതിയിലുണ്ടായിരുന്നു. കോടതിയില്‍ ഹാജരായ ഹഫീഫ കുടുംബത്തോടെപ്പം പോവാനാണ് താല്‍പര്യമെന്ന് അറിയിച്ചിരുന്നു. എന്നാല്‍ കുടുംബത്തിന്റെ ഭീഷണിക്ക് വഴങ്ങിയാണ് മൊഴി മാറ്റി നല്‍കിയത് എന്നാണ് സുമയ്യ ഷെരീഫ് പറയുന്നത്.
