മുന്‍ കായികതാരം പിടി ഉഷയെ രാജ്യസഭ നിയന്ത്രിക്കാനുള്ള ഉപാധ്യക്ഷന്മാരുടെ പാനലില്‍ ഉള്‍പ്പെടുത്തി
മുന്‍ കായികതാരം പിടി ഉഷയെ രാജ്യസഭ നിയന്ത്രിക്കാനുള്ള ഉപാധ്യക്ഷന്മാരുടെ പാനലില്‍ ഉള്‍പ്പെടുത്തി. രാജ്യസഭ ചെയര്‍മാന്‍ ജഗ്ദീപ് ധന്‍ഖര്‍ ആണ് ഉഷയെ ഉപാധ്യക്ഷന്മാരുടെ പാനലിലേക്ക് നോമിനേറ്റ് ചെയ്തതായി അറിയിച്ചത്.രാജ്യസഭയിലേക്ക് കേന്ദ്ര സര്‍ക്കാരാണ് പിടി ഉഷയെ നാമനിര്‍ദേശം ചെയ്തത്. രാജ്യസഭയുടെ ചരിത്രത്തിലാദ്യമായാണ് വൈസ് ചെയര്‍മാന്റെ ഉത്തരവാദിത്തം നിര്‍വഹിക്കാന്‍ നാമനിര്‍ദേശം ചെയ്യപ്പെട്ട അംഗത്തെ തിരഞ്ഞെടുക്കുന്നതെന്ന് ധന്‍ഖര്‍ വ്യക്തമാക്കി. ആന്ധ്രപ്രദേശില്‍നിന്നുള്ള വൈഎസ്ആര്‍ കോണ്‍ഗ്രസ് പാര്‍ട്ടി എം.പി വിജയ്‌സായ് റെഡ്ഡിയെയും ഉഷക്കൊപ്പം പാനലില്‍ ഉള്‍പ്പെടുത്തിയിട്ടുണ്ട്.ഡിസംബര്‍ 19ലെ മുന്‍കാല പ്രാബല്യത്തോടെയാണ് നിയമനം. സാധാരണ മുന്‍കാല പാര്‍ലമെന്ററി പരിചയമുള്ളവര്‍ക്കാണ് സഭ നിയന്ത്രിക്കാനുള്ള ഉത്തരവാദിത്തം നല്‍കാറുള്ളത്.
