അമേരിക്കയുടെ ‘ആഗോള കിരീടം’ വീണു ! ലോകത്തിലെ ഏറ്റവും ശക്തമായ പാസ്‌പോർട്ട് ഇനി പഴങ്കഥ

ഒരു കാലത്ത് ലോകമെമ്പാടുമുള്ള യാത്രാ സ്വാതന്ത്ര്യത്തിന്റെ പ്രതീകമായി കണക്കാക്കപ്പെട്ടിരുന്ന അമേരിക്കൻ പാസ്‌പോർട്ടിന്റെ ആഗോള നില തകരുന്ന വാർത്തകളാണ് ഇപ്പോൾ പുറത്തുവരുന്നത്. വാർത്ത ഏജൻസിയായ റഷ്യ ടുഡേ റിപ്പോർട്ട് ചെയ്തതനുസരിച്ച് വിസയില്ലാതെ എത്തിച്ചേരാവുന്ന രാജ്യങ്ങളുടെ എണ്ണത്തെ അടിസ്ഥാനമാക്കി ലോക യാത്രാ സ്വാതന്ത്ര്യം അളക്കുന്ന ഏറ്റവും പുതിയ ഹെൻലി പാസ്‌പോർട്ട് സൂചികയിൽ, അമേരിക്ക ആദ്യത്തെ പത്ത് രാജ്യങ്ങളുടെ പട്ടികയിൽ നിന്ന് പുറത്തായിരിക്കുകയാണ്. ഈ തിരിച്ചടി കേവലം ഒരു റാങ്കിംഗിലെ മാറ്റം മാത്രമല്ല. ലോകമെമ്പാടുമുള്ള മൊബിലിറ്റിയിലും സോഫ്റ്റ് പവർ ഡൈനാമിക്സിലും അമേരിക്കൻ സ്വാധീനം കുറയുന്നു എന്നതിന്റെ വ്യക്തമായ സൂചനയാണിത്.ലണ്ടൻ ആസ്ഥാനമായുള്ള പൗരത്വ, താമസ കൺസൾട്ടൻസി സ്ഥാപനമായ ഹെൻലി & പാർട്ണേഴ്‌സ്, ഇന്റർനാഷണൽ എയർ ട്രാൻസ്‌പോർട്ട് അസോസിയേഷൻ ഡാറ്റ ഉപയോഗിച്ച് 20 വർഷമായി ഈ നിർണ്ണായക റാങ്കിംഗ് സമാഹരിക്കുന്നുണ്ട്. 2014-ൽ ഈ പട്ടികയിൽ ഒന്നാം സ്ഥാനത്തുണ്ടായിരുന്ന അമേരിക്കൻ പാസ്‌പോർട്ട് 2024 ൽ ഏഴാം സ്ഥാനത്തേക്ക് തള്ളപ്പെട്ടിരുന്നു. എന്നാൽ ഏറ്റവും പുതിയ റിപ്പോർട്ട് പ്രകാരം, അമേരിക്ക ഇപ്പോൾ മലേഷ്യയ്‌ക്കൊപ്പം 12-ാം സ്ഥാനത്തേക്ക് കൂപ്പുകുത്തിയിരിക്കുകയാണ്. 180 രാജ്യങ്ങളിലേക്ക് അമേരിക്കക്കാർക്ക് വിസയില്ലാതെ യാത്ര ചെയ്യാൻ സാധിക്കുമ്പോഴും, പട്ടികയിൽ മുന്നിലുള്ള സിംഗപ്പൂർ, ദക്ഷിണ കൊറിയ, ജപ്പാൻ എന്നീ ഏഷ്യൻ രാജ്യങ്ങളേക്കാൾ പിന്നിലാണ് ഇന്ന് അമേരിക്കയുടെ സ്ഥാനം.അമേരിക്കൻ പാസ്‌പോർട്ടിന്റെ ഈ ദയനീയമായ ഇടിവിന് പിന്നിൽ ശക്തവും നയപരവുമായ കാരണങ്ങളുണ്ടെന്ന് പുതിയ റിപ്പോർട്ട് ചൂണ്ടിക്കാട്ടുന്നു. പ്രധാനമായും, അമേരിക്കയുമായുള്ള ബന്ധങ്ങളിലെ പ്രശ്‌നങ്ങൾ കാരണം ബ്രസീലിലേക്കും ചൈനയിലേക്കുമുള്ള വിസ രഹിത പ്രവേശനം അമേരിക്കക്ക് നഷ്ടമായി. പാപുവ ന്യൂ ഗിനിയ, മ്യാൻമർ, വിയറ്റ്നാം, സൊമാലിയ തുടങ്ങിയ രാജ്യങ്ങളിലെ നയപരമായ മാറ്റങ്ങളും ഈ തിരിച്ചടിക്ക് ആക്കം കൂട്ടി.ഇതിലെ ഏറ്റവും പ്രധാന ഘടകം, അമേരിക്കൻ പ്രസിഡന്റ് ഡോണൾഡ് ട്രംപിന്റെ കർശനമായ കുടിയേറ്റ നിയന്ത്രണ നയങ്ങളാണ്. നിയമവിരുദ്ധ കുടിയേറ്റം, മയക്കുമരുന്ന് കടത്ത് എന്നിവയിൽ തുടങ്ങിയ ഈ നിയന്ത്രണങ്ങൾ വിനോദസഞ്ചാരികൾ, വിദേശ തൊഴിലാളികൾ, വിദ്യാർത്ഥികൾ എന്നിവർക്കുള്ള നിയമങ്ങൾ കർശനമാക്കുന്നതിലേക്ക് വ്യാപിച്ചു. 19 രാജ്യങ്ങളിൽ നിന്നുള്ള യാത്രക്കാർക്കുള്ള സമീപകാല വിസ നിയന്ത്രണങ്ങളും, 36 രാജ്യങ്ങളെ വരെ നിരോധിക്കുമെന്ന ട്രംപിന്റെ ഭീഷണിയും ഈ ഇടിവിന് പ്രധാന കാരണമായതായി റിപ്പോർട്ട് പറയുന്നു.അമേരിക്കക്കാർക്ക് 227 സ്ഥലങ്ങളിൽ 180 എണ്ണവും വിസ രഹിതമായി സന്ദർശിക്കാമെങ്കിലും, അമേരിക്ക കേവലം 46 രാജ്യങ്ങൾക്ക് മാത്രമാണ് ഇതേ വിസ രഹിത പദവി തിരിച്ച് നൽകുന്നത്. “തുറന്ന മനോഭാവവും സഹകരണവും സ്വീകരിക്കുന്ന രാഷ്ട്രങ്ങൾ മുന്നേറുകയാണ്, അതേസമയം മുൻകാല പദവികളിൽ ആശ്രയിക്കുന്നവർ പിന്നോട്ട് പോകുകയാണ്,” എന്ന് ഹെൻലിയുടെ ചെയർമാൻ ക്രിസ്റ്റ്യൻ എച്ച്. കെയ്‌ലിൻ വിമർശിക്കുന്നു.ട്രംപിൻ്റെ സംരക്ഷണവാദപരമായ നയങ്ങൾ ആഗോള ചലനാത്മകതയെ എങ്ങനെ ബാധിച്ചു എന്നതിനെക്കുറിച്ചും റിപ്പോർട്ടിൽ പറയുന്നു. “ട്രംപ് അധികാരത്തിൽ തിരിച്ചെത്തിയത് അമേരിക്കയുടെ ചലനാത്മകതയെ ദുർബലപ്പെടുത്തുന്ന പുതിയ വ്യാപാര സംഘർഷങ്ങൾക്ക് കാരണമായി,” എന്ന് ഗ്രാൻ്റ് തോൺടൺ ചൈനയിലെ ഡോ. ടിം ക്ലാറ്റ് ചൂണ്ടിക്കാട്ടുന്നു. അമേരിക്കയും ചൈനയും തമ്മിലുള്ള നിലവിലെ വ്യാപാര യുദ്ധം, രാജ്യങ്ങൾക്ക് മേൽ താരിഫുകൾ ചുമത്തൽ തുടങ്ങിയ നീക്കങ്ങൾ അമേരിക്കൻ പാസ്‌പോർട്ടിനോടുള്ള ആഗോള സമീപനം മാറ്റാൻ മറ്റ് രാജ്യങ്ങളെ പ്രേരിപ്പിച്ചു.ചൈനയുടെ കാര്യം നോക്കുകയാണെങ്കിൽ കഴിഞ്ഞ ദശകത്തിൽ ചൈന ഗണ്യമായ മുന്നേറ്റമാണ് നടത്തിയത്. 2015-ൽ 94-ാം സ്ഥാനത്തായിരുന്ന ചൈന 2025-ൽ 64-ാം സ്ഥാനത്തേക്ക് ഉയർന്നു. ഈ കാലയളവിൽ വിസ രഹിത പ്രവേശനത്തിനുള്ള ലക്ഷ്യസ്ഥാനങ്ങൾ 37 എണ്ണം വർധിപ്പിച്ചു. 76 രാജ്യങ്ങൾക്ക് വിസ രഹിത പ്രവേശനം അനുവദിച്ച ചൈന, അമേരിക്കയെക്കാൾ 30 രാജ്യങ്ങൾക്ക് കൂടുതൽ യാത്രാ സ്വാതന്ത്ര്യം നൽകുന്നു. റഷ്യ, ഗൾഫ് രാജ്യങ്ങൾ, ദക്ഷിണ അമേരിക്കൻ, യൂറോപ്യൻ പങ്കാളികൾ എന്നിവരുമായി ചൈന അടുത്തിടെ ഒപ്പുവെച്ച വിസ രഹിത കരാറുകൾ, ആഗോള സഹകരണത്തിലുള്ള അവരുടെ പ്രതികജ്ഞാബദ്ധതയെ ആണ് എടുത്തുകാണിക്കുന്നത്. ടിം ക്ലാറ്റ് ചൂണ്ടിക്കാട്ടിയത് പോലെ, ട്രംപിന്റെ അധികാരത്തിലേക്കുള്ള മടങ്ങിവരവ് അമേരിക്കയുടെ ആഗോള ചലനാത്മകതയെ ദുർബലപ്പെടുത്തുന്ന പുതിയ വ്യാപാര സംഘർഷങ്ങൾക്ക് വഴിതുറന്നപ്പോൾ, ചൈനയുടെ തന്ത്രപരമായ മുന്നേറ്റം അവരുടെ ആഗോള സ്വാധീനം വർധിപ്പിക്കാൻ കാരണമായി.”2025-ൽ നിക്ഷേപ മൈഗ്രേഷൻ പ്രോഗ്രാമുകൾക്കായുള്ള അപേക്ഷകരിൽ ഏറ്റവും കൂടുതൽ അമേരിക്കക്കാരാണെന്ന് ഹെൻലി & പാർട്ണേഴ്‌സ് റിപ്പോർട്ട് ചെയ്യുന്നു. ഈ വർഷം മൂന്നാം പാദത്തോടെയുള്ള അപേക്ഷകൾ, മുൻ വർഷത്തെ മൊത്തം അപേക്ഷകളേക്കാൾ 67% ആണ് വർധിച്ചത്. ടെമ്പിൾ യൂണിവേഴ്സിറ്റി ലോ സ്കൂളിലെ പീറ്റർ ജെ. സ്പിറോ അഭിപ്രായപ്പെട്ടതുപോലെ, “ഇരട്ട പൗരത്വമാണ് പുതിയ അമേരിക്കൻ സ്വപ്നം.” അടഞ്ഞ നയങ്ങൾ സ്വീകരിക്കുന്ന അമേരിക്കയിൽ നിന്ന് വ്യത്യസ്തമായി, ചൈനയുടെ തുറന്ന സമീപനം ലോകമെമ്പാടുമുള്ള സാമ്പത്തിക, യാത്രാ ചലനാത്മകതയെ പുനർനിർമ്മിക്കുമെന്ന വ്യക്തമായ സന്ദേശമാണ് ഈ റിപ്പോർട്ട് നൽകുന്നത്.അമേരിക്കൻ പാസ്‌പോർട്ടിന്റെ ഈ തകർച്ച, ട്രംപിൻ്റെ ‘അമേരിക്ക ഫസ്റ്റ്’ നയങ്ങൾ ആഗോളതലത്തിൽ രാജ്യത്തിന് തന്നെ തിരിച്ചടിയായി മാറുന്നു എന്നതിൻ്റെ കൃത്യമായ സൂചനയാണ്. അമേരിക്കയുടെ സ്ഥാനം ചോദ്യം ചെയ്യപ്പെടുകയും, ഏകപക്ഷീയമായ നിലപാടുകൾ രാജ്യത്തിൻ്റെ ആഗോള മൊബിലിറ്റിയും സോഫ്റ്റ് പവർ ഡൈനാമിക്സും തകർക്കുകയും ചെയ്യുമെന്ന ശക്തമായ സന്ദേശമാണ് ഈ റിപ്പോർട്ട് നൽകുന്നത്. അമേരിക്കയുടെ ഈ നയപരമായ വീഴ്ചയുടെ ദീർഘകാല പ്രത്യാഘാതങ്ങൾ എന്തായിരിക്കുമെന്നാണ് ലോകം ഉറ്റുനോക്കുന്നത്.