വിവിധ ബാങ്കിങ്ങ് സേവനങ്ങൾകുടുംബശ്രീ ബി.സി സഖിമാർ മുഖേന താഴെതട്ടിൽ

കുടുംബശ്രീയും കാനറാ ബാങ്ക് കോർപ്പറേറ്റ് ബിസിനസ് കറസ്പോണ്ടന്റ് ഏജൻസിയും തമ്മിൽ ധാരണാപത്രം ഒപ്പു വച്ചു

തിരുവനന്തപുരം: കാനറാ ബാങ്ക് നൽകുന്ന വിവിധ സേവനങ്ങൾ ഇനി മുതൽ കുടുംബശ്രീ ബിസിനസ് കറസ്പോണ്ടന്റ്മാർ മുഖേന വാതിൽപ്പടിയിൽ എത്തും. കാനറാ ബാങ്കിൽ അക്കൗണ്ട് ഉള്ളവർക്കാണ് ഇവർ മുഖേന വിവിധ സേവനങ്ങൾ ലഭ്യമാവുക. ആദ്യഘട്ടത്തിൽ തിരുവനന്തപുരം മുതൽ തൃശൂർ വരെയുള്ള ജില്ലകളിലാണ് പദ്ധതി നടപ്പാക്കുക. ഡിജിറ്റൽ സാക്ഷരത ഇല്ലാത്തവർക്കും പെൻഷൻ വാങ്ങുന്നതടക്കമുള്ള ആവശ്യങ്ങൾക്കായി ബാങ്കിൽ പോകേണ്ടി വരുന്ന ശാരീരിക അവശത അനുഭവിക്കുന്നവരുമായ വ്യക്തികൾക്ക് ബി.സി സഖിമാരുടെ സേവനം ഏറെ സഹായകമാകും. കുടുംബശ്രീ എക്സിക്യൂട്ടീവ് ഡയറക്ടർ എച്ച് ദിനേശൻ കാനറാ ബാങ്കിന്റെ കോർപ്പറേറ്റ് ബിസിനസ് കറസ്പോണ്ടന്റ് ഏജൻസിയായ മാഗ്നോടിന്റെ സോണൽ മേധാവി കാർത്തികേയൻ എസ് എന്നിവർ ഇതു സംബന്ധിച്ച ധാരണാപത്രം കൈമാറി.

ബാങ്ക് അക്കൗണ്ട് തുറക്കൽ, പണം നിക്ഷേപിക്കലും പിൻവലിക്കലും ഉൾപ്പെടെയുള്ള പണം ഇടപാടുകൾ, അക്കൗണ്ട് ബാലൻസ് ചെക്കിങ്ങ്, വായ്പാ തിരിച്ചടവ്, റെക്കറിങ്ങ് ഡെപ്പോസിറ്റ്, ഇൻഷുറൻസ് എന്റോൾമെന്റും ക്ളെയിമും തുടങ്ങി വിവിധ സേവനങ്ങൾ ബി.സി സഖിമാർ മുഖേന ലഭിക്കും.

സാധാരണക്കാർക്ക് ബാങ്കിങ്ങ് സേവനങ്ങൾ വാതിൽപ്പടിയിൽ എത്തിക്കുന്നതിന് “ഒരു സി.ഡി.എസിൽ ഒരു ബി.സി സഖി’ എന്ന കുടുംബശ്രീ പദ്ധതിയാണ് നടപ്പാക്കുന്നത്. കാനറാ ബാങ്കുമായി ചേർന്നു പ്രവർത്തിക്കുന്നതോടെ സംസ്ഥാനത്ത് നിലവിൽ വിവിധ ബാങ്കുകൾക്കായി പ്രവർത്തിച്ചു വരുന്ന 760 ബി.സി സഖിമാർക്ക് പുറമേ പുതുതായി 350 പേർക്ക് കൂടി തൊഴിൽ ലഭ്യമാകും.

കുടുംബശ്രീ അയൽക്കൂട്ടങ്ങളിൽ നിന്നു തന്നെ തിരഞ്ഞെടുത്ത അംഗങ്ങളാണ് ബി.സി സഖിമാർ. ബാങ്കിങ്ങ് സേവനങ്ങൾ നൽകുന്നതിന് കമ്മീഷൻ വ്യവസ്ഥയിലാണ് ഇവരുടെ വരുമാനം. ബാങ്കുകളാണ് ഇതു നൽകുന്നത്. കൂടാതെ മികച്ച രീതിയിൽ പ്രവർത്തിക്കുന്നവർക്ക് കുടുംബശ്രീ മുഖേനയുള്ള സാമ്പത്തിക സഹായവും ലഭിക്കും.

കുടുംബശ്രീ ചീഫ് ഒാപ്പറേറ്റിങ്ങ് ഒാഫീസർ സി.നവീൻ, പബ്ളിക് റിലേഷൻസ് ഒാഫീസർ ഡോ.അഞ്ചൽ കൃഷ്ണ കുമാർ, കുടുംബശ്രീ സ്റ്റേറ്റ് അസിസ്റ്റന്റ് പ്രോഗ്രാം മാനേജർ ലിബിൻ ജി, മാഗ്നോട് കൺസൾട്ടൻസി സർവീസ് ക്ളസ്റ്റർ എക്സിക്യൂട്ടീവ് സുമിത എന്നിവർ ധാരണാപത്രം കൈമാറുന്ന ചടങ്ങിൽ പങ്കെടുത്തു.

പബ്ളിക് റിലേഷൻസ് ഒാഫീസർ
കുടുംബശ്രീ

ഫോട്ടോ അ ടിക്കുറിപ്പ്:
ബാങ്കിങ്ങ് സേവനങ്ങൾ താഴെ തട്ടിൽ ലഭ്യമാക്കുന്നതുമായി ബന്ധപ്പെട്ട് കുടുംബശ്രീ എക്സിക്യൂട്ടീവ് ഡയറക്ടർ എച്ച് ദിനേശൻ കാനറാ ബാങ്കിന്റെ കോർപ്പറേറ്റ് ബിസിനസ് കറസ്പോണ്ടന്റ് ഏജൻസിയായ മാഗ്നോടിന്റെ സോണൽ മേധാവി കാർത്തികേയൻ എസ് എന്നിവർ ധാരണാപത്രം കൈമാറുന്നു