കണ്ണൂരിൽ തെരുവുനായയുടെ കടിയേറ്റ 5 വയസ്സുകാരന് പേവിഷബാധ

കണ്ണൂർ : കണ്ണൂരിൽ തെരുവുനായയുടെ കടിയേറ്റ അഞ്ചുവയസ്സുകാരൻ പേവിഷബാധ സ്ഥിരീകരിച്ച് അതീവ ഗുരുതരാവസ്ഥയിൽ വെന്റിലേറ്ററിൽ കഴിയുന്നു. തമിഴ്നാട് സ്വദേശിയുടെ കുട്ടിക്കാണ് പേവിഷബാധ സ്ഥിരീകരിച്ചിരിക്കുന്നത്. മെയ് 31-ന് പയ്യാമ്പലത്ത് വെച്ചാണ് കുട്ടിയെ തെരുവുനായ ആക്രമിച്ചത്. കുട്ടിക്ക് വാക്സിൻ നൽകിയിട്ടും പേവിഷബാധ സ്ഥിരീകരിച്ചത് ആശങ്കയുളവാക്കുന്നു.കുട്ടിയുടെ ആരോഗ്യനില അതീവ ഗുരുതരമാണെന്നും പരിയാരം ഗവൺമെൻ്റ് മെഡിക്കൽ കോളേജിലെ വെൻ്റിലേറ്ററിൽ ചികിത്സയിലാണ് എന്നും അധികൃതർ അറിയിച്ചു. കണ്ണിന് താഴെ കടിയേറ്റതിനാൽ വളരെ വേഗം തലച്ചോറിനെ ബാധിച്ചതാണ് രോഗം ഗുരുതരമാകാൻ കാരണം. വാക്സിൻ എടുത്തുകൊണ്ടിരിക്കെയാണ് കുട്ടിയ്ക്ക് പേവിഷബാധ സ്ഥിരീകരിച്ചത്. ആരോഗ്യനില മോശമായതിനെ തുടർന്ന് കുട്ടിയെ കണ്ണൂർ ജില്ലാ ആശുപത്രിയിൽ പ്രവേശിപ്പിച്ചു.പരിശോധനയിൽ പേവിഷബാധ സ്ഥിരീകരിച്ചതിനെ തുടർന്ന് കുട്ടിയെ പിന്നീട് പരിയാരം മെഡിക്കൽ കോളേജിലേക്ക് മാറ്റുകയായിരുന്നു. കുട്ടിക്ക് മുഖത്തും കണ്ണിന്റെ ഭാഗത്തും ഗുരുതരമായി പരുക്കേറ്റിട്ടുണ്ട്. രണ്ട് ദിവസം മുൻപാണ് കുട്ടിയുടെ ആരോഗ്യനില വഷളായത്. വാക്സിൻ നൽകുന്നതിന് മുൻപ് തന്നെ രോഗം തലച്ചോറിനെ ബാധിച്ചുതുടങ്ങിയിരുന്നുവെന്ന് ഡോക്ടർമാർ പറയുന്നു.