മെസ്സിയുടെ ഓട്ടോഗ്രാഫുള്ള ജേഴ്സി മോഹൻലാലിന്
ലയണൽ മെസ്സിയുടെ ഓട്ടോഗ്രാഫുള്ള ജേഴ്സി നടൻ മോഹൻലാലിന് ലഭിച്ചു. ഈ സമ്മാനം തനിക്ക് ലഭിച്ചതിന്റെ സന്തോഷം മോഹൻലാൽ സോഷ്യൽ മീഡിയയിലൂടെ ആരാധകരുമായി പങ്കുവച്ചു. ‘പ്രിയപ്പെട്ട ലാലേട്ടന്’ എന്നെഴുതിയ ശേഷമാണ് മെസ്സി ജേഴ്സിയിൽ ഒപ്പുവെച്ചത്. ഡോ. രാജീവ് മാങ്ങോട്ടിലും രാജേഷ് ഫിലിപ്പുമാണ് ഈ അമൂല്യ നിമിഷം മോഹൻലാലിനായി സമ്മാനിച്ചത്.
ഈ സമ്മാനം ലഭിച്ച നിമിഷത്തെ അവിസ്മരണീയമായി മോഹൻലാൽ വിശേഷിപ്പിച്ചു. സമ്മാനം അഴിച്ചപ്പോൾ തന്റെ ഹൃദയമിടിപ്പ് നിലച്ചുപോയെന്നും മോഹൻലാൽ കുറിച്ചു. കളിക്കളത്തിലെ മെസ്സിയുടെ മികവിനും എളിമയ്ക്കും ആരാധകനായ തനിക്ക് ഈ സമ്മാനം വിലമതിക്കാനാവാത്തതാണെന്നും അദ്ദേഹം കൂട്ടിച്ചേർത്തു.
മെസി ജേഴ്സിയിൽ ഒപ്പിടുന്ന വീഡിയോയും മോഹൻലാൽ പങ്കുവെച്ചിട്ടുണ്ട്. ഡോ. രാജീവ് മാങ്ങോട്ടിൽ, രാജേഷ് ഫിലിപ്പ് എന്നീ സുഹൃത്തുക്കളില്ലാതെ ഈ അവിശ്വസനീയ നിമിഷം സാധ്യമാകുമായിരുന്നില്ലെന്ന് മോഹൻലാൽ കൃതജ്ഞതയോടെ പറഞ്ഞു. ഹൃദയത്തിന്റെ അടിത്തട്ടിൽ നിന്ന് ഏവർക്കും നന്ദി രേഖപ്പെടുത്തുന്നതായും മോഹൻലാൽ കുറിച്ചു.
ജീവിതത്തിലെ ചില നിമിഷങ്ങൾ വാക്കുകൾ കൊണ്ട് പറയാൻ പറ്റാത്തത്ര ആഴമുള്ളതാണെന്നും അവ എന്നെന്നും നമ്മളോടൊപ്പം നിലനിൽക്കുമെന്നും മോഹൻലാൽ തന്റെ ഫെയ്സ്ബുക്ക് കുറിപ്പിൽ പങ്കുവെച്ചു. ലയണൽ മെസ്സി ഒപ്പിട്ട ജേഴ്സി തനിക്ക് ലഭിച്ച അവിസ്മരണീയ നിമിഷത്തെക്കുറിച്ചും മോഹൻലാൽ വിശദമായി കുറിച്ചു.
