തമിഴ്നാട് ബസിന്റെ ബ്രേക്ക് അപകട കെണിയായി നിരവധി പേർക്ക് പരിക്ക് : മൂന്നുപേരുടെ നില ഗുരുതരം

ഇടുക്കി : ഇടുക്കി പൂപ്പാറയിൽ തമിഴ്നാട് ബസ് അപകടത്തിൽപ്പെട്ട് നിരവധി പേർക്ക് പരിക്ക്. മൂന്നുപേരുടെ നില ഗുരുതരം. ഇവരെ തേനി മെഡിക്കൽ കോളേജിലേക്ക് മാറ്റി. ബ്രേക്ക് നഷ്ടപ്പെട്ട വാഹനം സമീപത്തെ പാറക്കെട്ടിൽ ഇടിച്ച് കയറുകയായിരുന്നു.മധുരയിൽ നിന്നും മൂന്നാറിലേക്ക് പോവുകയായിരുന്ന തമിഴ്നാട് ട്രാൻസ്പോർട്ട് കോർപ്പറേഷൻ ബസ്സാണ് ഇടുക്കി പൂപ്പാറയ്ക്ക് സമീപം തലക്കുളത്ത് അപകടത്തിൽപ്പെട്ടത്. ബ്രേക്ക് നഷ്ടപ്പെട്ടതാണ് വാഹനം അപകടത്തിൽ പെടാൻ കാരണമെന്നാണ് പ്രാഥമിക നിഗമനം. വളവു തിരിഞ്ഞെത്തിയ വാഹനം സമീപത്തെ പാറക്കെട്ടിൽ ഇടിച്ചു നിർത്തുകയായിരുന്നു. ബസിന്റെ മുൻഭാഗം പൂർണമായും തകർന്നു . പരിക്കേറ്റവരെ നാട്ടുകാരും ഇതുവഴി വന്ന വാഹന യാത്രകരും ചേർന്ന് സമീപത്തുള്ള വിവിധ ആശുപത്രികളിലേക്ക് എത്തിച്ചു. ഗുരുതരമായി പരിക്കേറ്റ മൂന്നു പേരെ തമിഴ്നാട് തേനി മെഡിക്കൽ കോളേജിലേക്ക് കൊണ്ടുപോയി. മറ്റാരുടെയും നില ഗുരുതരമല്ല. കൊച്ചി ധനുഷ്കോടി ദേശീയപാതയുടെ ഭാഗമായ മൂന്നാർ മുതൽ ബോഡിമെട്ട് വരെയുള്ള റോഡ് നവീകരണ പ്രവർത്തനങ്ങൾ നടത്തിയതിന് ശേഷം വാഹനങ്ങളുടെ അമിതവേഗത അപകടങ്ങൾക്ക് കാരണമാകുന്നുണ്ടെന്ന് നാട്ടുകാർ പറയുന്നു.