പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടു പോകാൻ ശ്രമിച്ച ഇതര സംസ്ഥാന തൊഴിലാളി പിടിയിൽ

പെരുമ്പാവൂർ: റോഡരികിലെ പൈപ്പിൽ നിന്ന് വെള്ളം എടുക്കാൻ നിന്ന പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടു പോകാൻ ശ്രമിച്ച പ്രതിയെ പോലീസ് അറസ്റ്റ് ചെയ്തു. ഒറീസ സ്വദേശി പ്രശാന്ത് മാലിക്കിനെയാണ് പെരുമ്പാവൂർ പോലീസ് അറസ്റ്റ് ചെയ്തത്. ഞായറാഴ്ച വൈകിട്ട് 7.40ന് മുടിക്കൽ പെരിയാർ ജംഗ്ഷനിൽ ആണ് സംഭവം. വെള്ളം എടുക്കുന്നതിനായി പൈപ്പിൻ ചുവട്ടിൽ നിൽക്കുകയായിരുന്ന പെൺകുട്ടിയെ ഇയാൾ എടുത്ത് തോളത്തിട്ട് ഓടുകയായിരുന്നു. കുട്ടി ഒച്ച വച്ചത് കേട്ട് സമീപത്തുള്ള നാട്ടുകാർ ഓടിക്കൂടി ഇയാളെ തടഞ്ഞുനിർത്തി കുട്ടിയെ രക്ഷപ്പെടുത്തി.ഉടൻതന്നെ പെരുമ്പാവൂർ പോലീസ് സ്ഥലത്തെത്തി പ്രതിയെ കസ്റ്റഡിയിലെടുത്തു. പെൺകുട്ടിയുടെ മാതാവിന്റെ പരാതിയുടെ അടിസ്ഥാനത്തിൽ ഇയാൾക്കെതിരെ കേസെടുത്തു. പെരുമ്പാവൂർ ജുഡീഷ്യൽ ഒന്നാം ക്ലാസ് മജിസ്‌ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.