കര്‍ണാടകയില്‍ ബി.ജെ.പി സഖ്യത്തോടൊപ്പം ചേര്‍ന്ന മതേതര ജനതാദളിന്റെ ജെ.ഡി.എസ്
തിരുവനന്തപുരം: കര്‍ണാടകയില്‍ ബി.ജെ.പി സഖ്യത്തോടൊപ്പം ചേര്‍ന്ന മതേതര ജനതാദളിന്റെ (ജെ.ഡി.എസ്) സംസ്ഥാന ഘടകത്തിനു താക്കീതുമായി സി.പി.എം. ബി.ജെ.പിയുമായി ബന്ധമുള്ള പാര്‍ട്ടിയായി ഇടതു മുന്നണിയില്‍ തുടരാനാകില്ലെന്ന് സിപിഎം മുന്നറിയിപ്പ് നല്‍കി. അടിയന്തരമായി പ്രശ്‌നം പരിഹരിക്കാനും നിര്‍ദേശമുണ്ട്. ജെ.ഡി.എസ് സംസ്ഥാന നേതൃത്വത്തെയാണ് സി.പി.എം ഇക്കാര്യം അറിയിച്ചത്.ബിജെപി സഖ്യത്തിന്റെ ഭാഗമാവുന്നതായി കഴിഞ്ഞ ദിവസം ദള്‍ ദേശീയ നേതൃത്വം വ്യക്തമാക്കിയിരുന്നു. പാര്‍ട്ടി നേതാക്കളായ മുന്‍ പ്രധാനമന്ത്രി ദേവഗൗഡയും മകനും കര്‍ണാടക മുന്‍ മുഖ്യമന്ത്രിയുമായ എച്ച്ഡി കുമാരസ്വാമിയും ഇക്കാര്യം സ്ഥിരീകരിച്ചു. ഈ പശ്ചാത്തലത്തിലാണ് നിലപാടു വ്യക്തമാക്കാന്‍ സംസ്ഥാന ദള്‍ നേതൃത്വത്തോട് സിപിഎം ആവശ്യപ്പെട്ടിരിക്കുന്നത്.ബിജെപി ബന്ധമുള്ള ദള്‍ മുന്നണിയില്‍ തുടരുന്നതിനെ ഒരു കാരണവശാലും അനുവദിക്കേണ്ടതില്ലെന്നാണ് സിപിഎം നേതൃത്വത്തിലെ ധാരണ. ഇത്തരമൊരു സാഹചര്യമുണ്ടായാല്‍ വര്‍ഗീയതയോടുള്ള സന്ധി ചെയ്യലായി അതു വിലയിരുത്തപ്പെടും. കോണ്‍ഗ്രസ് പ്രചാരണം അതില്‍ ഊന്നുമെന്നും പാര്‍ട്ടി കരുതുന്നു.ബിജെപി സഖ്യത്തില്‍ ചേരാനുള്ള ദേശീയ നേതൃത്വത്തിന്റെ നിലപാടിനൊപ്പമില്ലെന്ന് ജെ.ഡി.എസ് സംസ്ഥാന നേതൃത്വം ഇതിനകം വ്യക്തമാക്കിയിട്ടുണ്ട്. എന്നാല്‍ ജെ.ഡി.എസില്‍ തുടര്‍ന്നുകൊണ്ടുതന്നെ സംസ്ഥാന നേതൃത്വത്തിന് ഇത്തരമൊരു നിലപാടെടുക്കാനാവില്ല. അതിനാല്‍ സംസ്ഥാന ഘടകം പുതിയ പാര്‍ട്ടിയായി മാറുന്നതിനെക്കുറിച്ചാണ് ചര്‍ച്ച നടക്കുന്നത്. എല്‍ജെഡിയുമായി സഹകരിക്കുന്നതിനെക്കുറിച്ച് പാര്‍ട്ടിയില്‍ ഒരു വിഭാഗം ചര്‍ച്ച നടത്തുന്നുണ്ട്. എന്നാല്‍ മാത്യു ടി തോമസിന്റെ നേതൃത്വത്തിലുള്ള വിഭാഗത്തിന് ഇതിനോടു താത്പര്യമില്ല. തുടര്‍ നടപടികളെക്കുറിച്ചു ചര്‍ച്ച ചെയ്യാന്‍ അടുത്ത ഏഴിന് ജെഡിഎസ് സംസ്ഥാന നേതൃയോഗം വിളിച്ചു ചേര്‍ത്തിട്ടുണ്ട്.
