കൊല്ലത്ത് യുവാവിനെ കാറിടിച്ചു കൊലപ്പെടുത്താന്‍ ശ്രമം
കൊല്ലം: എഴുകോണില്‍ യുവാവിനെ കാറിടിച്ചു കൊലപ്പെടുത്താന്‍ ശ്രമം. കിഴക്കേമാറനാട് സ്വദേശി മനുവിനെയാണ് കാറിടിച്ചു കൊലപ്പെടുത്താന്‍ ശ്രമിച്ചത്. അപകടത്തിന്റെ സിസിടിവി ദൃശ്യങ്ങള്‍ പുറത്തായി. എഴുകോണ്‍ വട്ടമണ്‍കാവിലാണ് വെള്ള നിറത്തിലുള്ള കാര്‍ മനുവിനെ ഇടിച്ചു വീഴ്ത്തിയത്.നമ്പര്‍ മറച്ചു വച്ച കാര്‍ മനു സഞ്ചരിച്ച ഇരുചക്ര വാഹനത്തില്‍ ഇടിക്കുകയായിരുന്നു. മുന്നോട്ടു പോയ കാര്‍ വീണ്ടും തിരികെയെത്തി മനുവിനെ വീണ്ടും ഇടിക്കാന്‍ ശ്രമിച്ചതായും ദൃശ്യങ്ങളില്‍ ഉണ്ട്. കഴിഞ്ഞദിവസം വൈകിട്ട് ആറിനാണ് അപകടമുണ്ടാക്കിയത്. പരുക്കേറ്റ മനു കൊട്ടാരക്കര താലൂക്ക് ആശുപത്രിയില്‍ ചികിത്സ തേടി.കാറില്‍ ഉണ്ടായിരുന്ന യുവാക്കളെ മനു തിരിച്ചറിഞ്ഞതായാണ് വിവരം. ഒരു ഉത്സവവുമായി ബന്ധപ്പെട്ട് ഇവര്‍ തമ്മില്‍ നേരത്തെ കലഹം ഉണ്ടായിരുന്നു. അതിന്റെ തുടര്‍ച്ചയാകാം ഇതെന്നാണ് സംശയം. സമീപത്തെ സിസിടിവി ക്യാമറയില്‍ നിന്ന് ലഭിച്ച ദൃശ്യങ്ങള്‍ പ്രകാരം പൊലീസ് അന്വേഷണം തുടങ്ങി. കാറിന് നമ്പര്‍ പ്ലേറ്റ് ഉണ്ടായിരുന്നില്ല. മനു ക്രിമിനല്‍ കേസുകളില്‍ പ്രതി ആയിട്ടുള്ള ആളാണെന്ന് പൊലീസ് പറഞ്ഞു. പരാതി നല്‍കാത്തതിനാല്‍ പൊലീസ് കേസ് റജിസ്റ്റര്‍ ചെയ്തിട്ടില്ലെങ്കിലും അന്വേഷണം ആരംഭിച്ചു
