ഔഗേൻ ബാവാ മാർത്തോമ്മൻ പൈതൃകത്തിന്റെ കാവൽഭടൻ : പരിശുദ്ധ കാതോലിക്കാ ബാവാ

കോട്ടയം : വിനയവും ദീനാനുകമ്പയും കരുതലും ജീവിത ശൈലിയാക്കിയ പരമയോ​ഗിയായിരുന്നു പരിശുദ്ധ ബസേലിയോസ് ഔ​ഗേൻ പ്രഥമൻ കാതോലിക്കാബാവായെന്ന് മലങ്കരസഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ അനുസ്മരിച്ചു. ഔ​​ഗേൻ പ്രഥമൻ കാതോലിക്കാ ബാവായുടെ ചരമ കനക ജൂബിലി സ്മൃതിസന്ധ്യ സഭാ ആസ്ഥാനമായ ദേവലോകം കാതോലിക്കേറ്റ് അരമനയിൽ ഉദ്ഘാടനം ചെയ്ത് സംസാരിക്കുകയായിരുന്നു പരിശുദ്ധ ബാവാ. അറിയപ്പെടുന്ന സുറിയാനി പണ്ഡിതൻ എന്ന നിലയിൽ ഔ​ഗേൻ ബാവാ സഭയുടെ ആരാധനക്രമങ്ങൾക്ക് നൽകിയ സംഭാവനകൾ വിലമതിക്കാനാകാത്തതാണ്. സുറിയാനി ഭാഷയെ അതിന്റെ ഉറവിടത്തിൽ പോയി ഹൃദിസ്ഥമാക്കാൻ ഔ​ഗേൻ ബാവാ പുലർത്തിയ ആവേശം അദ്ദേഹത്തിന്റെ രചനകളെ മനോഹരങ്ങളാക്കിമാറ്റി. പ്രതിസന്ധിയുടെ കാലഘട്ടത്തിൽ മാർത്തോമ്മൻ പൈതൃകത്തെ ഒരു കെടാവിളക്ക് പോലെ കാത്ത് സൂക്ഷിച്ച കാവൽ ഭടനായിരുന്നു ഔ​ഗേൻ ബാവായെന്നും സഭാധ്യക്ഷൻ കൂട്ടിച്ചേർത്തു. ചങ്ങനാശേരി അതിരൂപത ആർച്ച് ബിഷപ്പ് അഭിവന്ദ്യ മാർ തോമസ് തറയിൽ അനുസ്മരണപ്രഭാഷണം നടത്തി. സുറിയാനി ഭാഷാ പൈതൃകത്തെ അടുത്ത തലമുറയിലേക്ക് കൈമാറിയ മഹാ​ഗുരുവായിരുന്നു പരിശുദ്ധ ഔ​ഗേൻ ബാവായെന്ന് അദ്ദേഹം അനുസ്മരിച്ചു. ഭാരതീയ ശൈലി ജീവിതത്തിൽ പകർത്തിയ ഒരു സന്യാസിയായിരുന്നു ഔ​ഗേൻ ബാവായെന്നും മാർ തോമസ് തറയിൽ പറഞ്ഞു.മലങ്കരയിലെ സുറിയാനി വൈജ്ഞാനികധാര : ആരാധനാ ക്രമീകരണങ്ങളിൽ പരിശുദ്ധ ഔ​ഗേൻ ബാവായുടെ സംഭാവനകൾ എന്ന വിഷയത്തിൽ മലങ്കര മൽപ്പാൻ ഫാ.ഡോ.ജോൺസ് ഏബ്രഹാം കോനാട്ട് റീശ് കോർഎപ്പിസ്കോപ്പാ, പരിശുദ്ധ ഔ​ഗേൻ ബാവായുടെ രചനകളിലെ സാ​ഹിത്യ സൗന്ദര്യവും മഹർഷിദർശനങ്ങളും എന്ന വിഷയത്തിൽ ഫാ.ഡോ.ജേക്കബ് കുര്യൻ, മലങ്കരയിലെ സുറിയാനി ഭാഷാ പാരമ്പര്യങ്ങളിൽ പരിശുദ്ധ ഔ​ഗേൻ ബാവായുടെ സംഭാവനകൾ എന്ന വിഷയത്തിൽ ഫാ.ഡോ.ബേബി വർ​ഗീസ്, പരിശുദ്ധ ഔ​ഗേൻ ബാവാ കാതോലിക്കാ സിംഹാസനത്തിലെ മാർത്തോമ്മൻ പൈതൃകത്തിന്റെ പ്രകാശം എന്ന വിഷയത്തിൽ ഫാ.ഡോ.എം.ഒ.ജോൺ എന്നിവർ പ്രബന്ധാവതരണം നടത്തി.സ്മൃതിമൊഴിയിൽ സഭാ അൽമായ ട്രസ്റ്റി റോണി വർ​ഗീസ് സംസാരിച്ചു.എപ്പിസ്ക്കോപ്പൽ‍ സുന്നഹദോസ് സെക്രട്ടറി ഡോ.യൂഹാനോൻ മാർ ക്രിസോസ്റ്റമോസ്, ഡോ.യാക്കോബ് മാർ‍ ഐറേനിയസ്, യൂഹാനോൻ മാർ പോളിക്കാർപ്പോസ്, മാത്യൂസ് മാർ തേവോ​ദോസിയോസ്, ഡോ.യൂഹാനോൻ മാർ ദീയസ്ക്കോറോസ്, ഡോ.ജോഷ്വാ മാർ നിക്കോദീമോസ്, ഡോ. ​ഗീവർ​ഗീസ് മാർ യൂലിയോസ് എന്നീ മെത്രാപ്പോലീത്താമാർ, സഭാ വർക്കിം​ഗ് കമ്മറ്റി, മാനേജിം​ഗ് കമ്മറ്റി അം​ഗങ്ങൾ, വിവിധ പ്രസ്ഥാനങ്ങളുടെ പ്രതിനിധികൾ, വൈദിക സെമിനാരി വിദ്യാർത്ഥികൾ, വിശ്വാസികൾ തുടങ്ങി നിരവധി പേർ ചടങ്ങിൽ സംബന്ധിച്ചു. ദേവലോകം അരമന മാനേജർ ഫാ.യാക്കോബ് തോമസ് റമ്പാൻ കൃതജ്ഞത രേഖപ്പെടുത്തി.