റോഡിൽ ഇനി ഉറക്കമില്ലാത്ത യാത്ര! ഡ്രൈവർ ഉറങ്ങിയാൽ അലാറം : ആദ്യ പരീക്ഷണയോട്ടം വിജയകരമായി പൂർത്തിയാക്കി മന്ത്രി കെ ബി ഗണേഷ് കുമാർ

കെഎസ്ആർടിസി വാങ്ങിയ ആധുനിക വോൾവോ സ്ലീപ്പർ ബസിന്റെ പരീക്ഷണയോട്ടം വിജയകരമായി പൂർത്തിയാക്കി മന്ത്രി കെ.ബി ഗണേഷ് കുമാർ. തിരുവല്ലം-കോവളം പാതയിലാണ് മന്ത്രി ബസ് ഓടിച്ചുനോക്കിയത്. വോൾവോയുടെ 42 പേർക്ക് യാത്രചെയ്യാവുന്ന ബസാണിത്. 9600 എസ്എൽഎക്സ് ശ്രേണിയിലെ ബസാണ് കോർപ്പറേഷൻ വാങ്ങിയത്. അത്യാധുനിക സൌകര്യങ്ങളോടു കൂടിയ ബസാണിത്. തീപിടിത്തം തടയുന്നതിനാവശ്യമായ അഗ്നിശമന നിയന്ത്രണ സംവിധാനങ്ങൾ ഈ മോഡലിലുണ്ട്. പുക ഉയരുന്നത് തിരിച്ചറിഞ്ഞ് അലാറം മുഴക്കാനുള്ള സജ്ജീകരണവും തീ കെടുത്തുന്നതിന് സ്പ്രിങ്ക്ളർ സിസ്റ്റവും ഉണ്ട്. കൂടാതെ ഡ്രൈവർ ഉറങ്ങിയാലോ ശ്രദ്ധ തെറ്റിയാലോ അലാറവും അടിയ്ക്കും. ഡ്രൈവറെ നിരീക്ഷിക്കാൻ ക്യാമറ സിസ്റ്റവും ഉണ്ട്. ഇതിന്റെ ദൃശ്യം കൺട്രോൾ റൂമിൽ ലഭിക്കുകയും ചെയ്യും.നീളംകൂടിയ ബസിൽ മറ്റ് മോഡലുകളിൽനിന്നും വ്യത്യസ്തമായി യാത്രക്കാർക്ക് കൂടുതൽ കാബിൻ സ്ഥലമുണ്ട്. വശങ്ങളിലെ കർട്ടൻ തീപിടിക്കാത്തതാണ്. സുരക്ഷ ഉറപ്പിക്കാൻ ആധുനിക എബിഎസ്, ഇലക്ട്രോണിക് ബ്രേക്ക്‌ ഡിസ്ട്രിബ്യൂഷൻ സിസ്റ്റം എന്നിവയുണ്ട്. അപകടഘട്ടങ്ങളിൽ വശങ്ങളിലെ ചില്ലുതകർത്ത് യാത്രക്കാർക്ക് വേഗത്തിൽ പുറത്തിറങ്ങാനാകും. എല്ലാ വിൻഡോകളിലും ഇതിനായി പ്രത്യേകതരം ചുറ്റികകളുണ്ട്.11 ഗിയറുള്ള ബസ് വാങ്ങുന്ന ആദ്യ പൊതുമേഖലാസ്ഥാപനമാണ് കെഎസ്ആർടിസി. ബസ് ഏത് റൂട്ടിലാകും ഓടിക്കുക എന്നതുസംബന്ധിച്ച് അന്തിമ തീരുമാനമായിട്ടില്ല. തിരുവനന്തപുരം-ബെംഗളൂരു, കൊച്ചി-ബെംഗളൂരു, തിരുവനന്തപുരം-ചെന്നൈ പാതകൾ പരിഗണനയിലുണ്ട്. അതേസമയം മദ്യപിച്ച് യാത്രചെയ്യാം, സഹയാത്രികരെയും ജീവനക്കാരെയും ശല്യം ചെയ്യരുതെന്നും മന്ത്രി വ്യക്തമാക്കി.