എയർ ലിഫ്റ്റിങിന് പണം ചോദിച്ചത് കേന്ദ്രം സംസ്ഥാനത്തോട് കാണിക്കുന്ന രാഷ്ട്രീയ അവഗണന: പ്രൊഫ. കെവി തോമസ്

കേരളത്തോട് എയർ ലിഫ്റ്റിങിന് പണം ചോദിച്ചത് കേന്ദ്രം സംസ്ഥാനത്തോട് കാണിക്കുന്ന രാഷ്ട്രീയമായ അവഗണനയാണെന്ന് പ്രൊഫ. കെവി തോമസ്. കേന്ദ്ര ആഭ്യന്തര സഹമന്ത്രി നേരത്തേ നൽകിയ സർക്കുലറിൽ ഇതെല്ലാം സൗജന്യ സേവനങ്ങളാണ് എന്നാണ് പറഞ്ഞിരുന്നത്. രാഷ്ട്രീയമായി മാത്രം കണ്ടുകൊണ്ട് ഒരു കേന്ദ്രസർക്കാർ സംസ്ഥാനത്തെ ഉപദ്രവിക്കുന്നത് തന്റെ പൊതു ജീവിതത്തിൽ ആദ്യമായാണ് കാണുന്നതെന്നും കെവി തോമസ് പറഞ്ഞു.

പ്രതിസന്ധികൾക്കിടയിലും മുണ്ടക്കൈ – ചൂരൽമല ദുരന്തത്തിൽ രക്ഷാദൗത്യത്തിൽ വ്യോമസേന എയർലിഫ്റ്റ് ചെയ്തതിൻ്റെ തുക നൽകാൻ സർക്കാർ തീരുമാനിച്ചിരുന്നു. 132. 61 കോടി രൂപയാകും നൽകുക. ആഭ്യന്തര മന്ത്രാലയം കേരളത്തിനു മേൽ സമ്മർദ്ദം ശക്തമാക്കിയ സാഹചര്യത്തിലാണ് സർക്കാർ തീരുമാനം.

അതേ സമയം, 2019ലെ പ്രളയം മുതൽ വയനാട് ദുരന്തം വരെയുള്ള ദുരന്തമുഖത്തെ എയര്‍ലിഫ്റ്റിങ് രക്ഷാദൗത്യത്തിന് ചെലവായ തുക ഒഴിവാക്കി തരണമെന്ന് കേരളം കേന്ദ്രത്തോട് വീണ്ടും ആവശ്യപ്പെടുമെന്നും കേന്ദ്രത്തിന്‍റേത് മര്യാദകേടാണെന്നും റവന്യു മന്ത്രി കെ രാജൻ പറഞ്ഞു.