കല്ലാറിൽ കാട്ടാനക്കൂട്ടത്തിന്റെ താണ്ഡവം
വിതുര : വിതുര പഞ്ചായത്തിലെ കല്ലാർ മേഖലയിൽ വീണ്ടും കാട്ടാനശല്യം രൂക്ഷമാകുന്നു. ജനവാസമേഖലകളിൽ കാട്ടാനകൾ ഇറങ്ങി ഭീതിയും നാശവും പരത്തുകയാണ്. കല്ലാർ ജംഗ്ഷനിൽ വരെ കാട്ടാനകൾ എത്തുന്നുണ്ട്. കഴിഞ്ഞദിവസം രാത്രിയിൽ കല്ലാർ ഗവ. എൽ.പി.എസിന് സമീപം അങ്കണവാടി അദ്ധ്യാപിക ഗിരിജയുടെ വിളയിലിറങ്ങിയ കാട്ടാനകൾ കവുങ്ങും, വാഴയും നശിപ്പിച്ചു. പതിനായിരക്കണക്കിന് രൂപയുടെ നാശനഷ്ടമുണ്ട്. ചുറ്റും സ്ഥാപിച്ചിരുന്ന കമ്പിവേലി തകർത്താണ് ആനകൾ നാശനഷ്ടം വിതച്ചത്. സമീപത്തെ പുരയിടങ്ങളിലെ വിളകളും നശിപ്പിച്ചു.
