കോട്ടയം നഗരത്തിൽ തമ്മിലടിച്ച് വിദ്യാർഥി സംഘടനകൾ

കോട്ടയം: കോട്ടയം നഗരത്തിൽ തമ്മിലടിച്ച് വിദ്യാർഥി സംഘടനകൾ. എസ്എഫ്ഐ – കെഎസ്‍യു പ്രവർത്തകരാണ് കോട്ടയം ജില്ലാ ആശുപത്രിക്ക് മുന്നിൽ ഏറ്റുമുട്ടിയത്.സിഎംഎസ് കോളേജിൽ നടന്ന എസ്എഫ്ഐ പരിപാടിക്കിടെ ഉണ്ടായ വാക്കേറ്റത്തെയും സംഘർഷത്തെയും തുടർന്ന് പരിക്കേറ്റ് കോട്ടയം ജില്ലാ ജനറൽ ആശുപത്രിയിൽ ചികിത്സയ്ക്കെത്തിയതായിരുന്നു എസ്എഫ്ഐ പ്രവർത്തകർ. എന്നാൽ ഇതറിഞ്ഞ് കെഎസ്‍യു പ്രവർത്തകർ കൂടി ആശുപത്രിയിലേക്ക് എത്തിയതോടെ ആശുപത്രി സംഘർഷഭൂമിയായി മാറി.ആശുപത്രിക്ക് മുന്നിൽ തമ്മിലടിച്ച പ്രവർത്തകരെ പോലീസെത്തിയാണ് നിയന്ത്രിച്ചത്. എന്നാൽ പിരിഞ്ഞ് പോകാൻ കൂട്ടാക്കാതെ പ്രവർത്തകർ ആശുപത്രിക്ക് മുന്നിൽ തന്നെ തമ്പടിച്ചിരിക്കുകയാണ്.എസ്എഫ്ഐ സിഎംഎസ് കോളേജിൽ മുൻകൂട്ടി നിശ്ചയിച്ച പരിപാടിയിൽ കെഎസ്‍യു പ്രവർത്തകർ എത്തി അവരുടെ പരിപാടി സംഘടിപ്പിക്കാൻ ശ്രമിച്ചതാണ് വാക്കേറ്റത്തിന് കാരണമായതെന്നാണ് എസ്എഫ്ഐയുടെ ആരോപണം. പ്രകോപനപരമായി എത്തിയ കെഎസ്‍യു പ്രവർത്തകർ സംഘർഷം അഴിച്ചുവിടുകയായിരുന്നുവെന്നും എസ്എഫ്ഐ ആരോപിച്ചു. ഇരുകൂട്ടരും കോളേജിന് മുന്നിൽ ഏറ്റുമുട്ടുകയായിരുന്നു.