കര്‍ണാടകയില്‍ വമ്പന്‍ വാഗ്ദാനങ്ങളുമായി ബിജെപിയുടെ പ്രകടന പത്രിക
ബെംഗളൂരു: കര്‍ണാടകയില്‍ വമ്പന്‍ വാഗ്ദാനങ്ങളുമായി ബിജെപിയുടെ പ്രകടന പത്രിക. ഏകീകൃത സിവില്‍ കോഡ് നടപ്പിലാക്കുമെന്നതുള്‍പ്പെടെ 15 ഇന വാഗ്ദാനങ്ങളാണ് പ്രകടനപത്രികയില്‍ ബിജെപി മുന്നോട്ട് വയ്ക്കുന്നത്. ബിജെപി ദേശീയ അധ്യക്ഷന്‍ ജെപി നദ്ദയാണ് ബെംഗളൂരുവില്‍ പ്രകടന പത്രിക പുറത്തിറക്കിയത്. കര്‍ണാടക മുഖ്യമന്ത്രി ബസവരാജ ബൊമ്മെ, മുതിര്‍ന്ന ബിജെപി നേതാവ് യെഡിയൂരപ്പ തുടങ്ങിയവരും ചടങ്ങില്‍ പങ്കെടുത്തു.യുവജനക്ഷേമം, അടിസ്ഥാനസൗകര്യ വികസനം, സ്ത്രീ ശാക്തീകരണം എന്നിവയിലൂന്നിയുള്ളതാണ് ബിജെപിയുടെ പ്രകടന പത്രിക. ബിപിഎല്‍ കുടുംബങ്ങള്‍ക്ക് വര്‍ഷത്തില്‍ 3 പാചക വാതക സിലിണ്ടര്‍ വീതം സൗജന്യമായി നല്‍കും കൂടാതെ പ്രതിദിനം അരലിറ്റര്‍ നന്ദിനി പാല്‍ സൗജന്യമായി നല്‍കുമെന്നും പ്രകടന പത്രികയില്‍ ബിജെപി വാഗ്ദാനം ചെയ്യുന്നു. അടല്‍ ആഹാര കേന്ദ്ര എന്ന പേരില് ചെലവ് കുറഞ്ഞ ഭക്ഷണശാലകള്‍ ആരംഭിക്കും. പോഷണ എന്ന പേരില് ബിപിഎല്‍ കുടുംബങ്ങള്‍ക്ക് മാസം തോറും 5 കിലോ ഭക്ഷ്യ ധാന്യം സൗജന്യമായി നല്‍കുമെന്നും പ്രകടന പത്രികയില്‍ പറയുന്നു.സ്വപ്ന സാക്ഷാത്കാരത്തിന്റെ നിറവിൽ രാജേഷ്വിവിധ മത്സരപരീക്ഷകളുടെ പരീശീലനത്തിനായി യുവാക്കള്‍ക്ക് സാമ്പത്തിക സഹായങ്ങള്‍ ലഭ്യമാക്കും. ആരോഗ്യ പരിപാലനത്തിനായി എല്ലാ വാര്‍ഡുകളിലും നമ്മ ക്ലിനിക്കുകള്‍ സജ്ജമാക്കും. ഇതിലൂടെ മുതിര്‍ന്ന പൗരന്മാര്‍ക്ക് വാര്‍ഷിക സൗജന്യ മെഡിക്കല്‍ ചെക്കപ്പും ഉറപ്പാക്കും. ഇലക്ട്രിക് വാഹനങ്ങള്‍ പ്രോത്സാഹിപ്പിക്കും. സംസ്ഥാനത്തിന്റെ ടൂറിസം വികസനത്തിനായി സമഗ്ര പദ്ധതികള്‍ നടപ്പിലാക്കുമെന്നും ബിജെപി വാഗ്ദാനം ചെയ്യുന്നു. മെയ് പത്താം തീയതിയാണ് കര്‍ണാടകയില്‍ നിയമസഭാ തെരഞ്ഞെടുപ്പ് നടക്കുന്നത്.
