ഖഗന്തക്-243 ഗ്ലൈഡ് ബോംബ് പരീക്ഷണം വിജയകരം ; ഇന്ത്യൻ വ്യോമസേന തദ്ദേശീയമായി വികസിപ്പിച്ച വജ്രായുധം

ഇന്ത്യൻ വ്യോമസേന തദ്ദേശീയമായി വികസിപ്പിച്ചെടുത്ത ഖഗന്തക്-243 ഗ്ലൈഡ് ബോംബിന്റെ പരീക്ഷണം വിജയകരമായി പൂർത്തിയാക്കി. പോർവിമാനങ്ങളിൽ നിന്നും വിക്ഷേപിക്കാവുന്ന ഈ അത്യാധുനിക ആയുധം ഇന്ത്യയുടെ വ്യോമ പ്രതിരോധ മേഖലയ്ക്ക് വലിയ കരുത്തായി മാറും. പ്രതിരോധ ഗവേഷണ വികസന കേന്ദ്രവും (ഡിആർഡിഒ) സ്വകാര്യ പങ്കാളികളും സംയുക്തമായാണ് ഈ ദീർഘദൂര സങ്കേതികവിദ്യ വികസിപ്പിച്ചത്. വ്യോമസേനയുടെ സുഖോയ്-30 എംകെഐ യുദ്ധവിമാനത്തിൽ നിന്നാണ് പരീക്ഷണ വിക്ഷേപണം നടത്തിയത്. ലക്ഷ്യസ്ഥാനത്ത് കൃത്യമായി പതിക്കാൻ സാധിച്ചതോടെ പരീക്ഷണം പൂർണ്ണ വിജയമാണെന്ന് ഉദ്യോഗസ്ഥർ സ്ഥിരീകരിച്ചു.ഏകദേശം 180 കിലോമീറ്ററിലധികം അകലെയുള്ള ശത്രുതാപരമായ ലക്ഷ്യങ്ങളെ കൃത്യതയോടെ തകർക്കാൻ ഈ ഗ്ലൈഡ് ബോംബിന് സാധിക്കും. ജിപിഎസ്, സാറ്റലൈറ്റ് നാവിഗേഷൻ അധിഷ്ഠിത ഗൈഡൻസ് സംവിധാനങ്ങളാണ് ഇതിൽ ഉപയോഗിച്ചിരിക്കുന്നത്. അതിനാൽ രാത്രിയെന്നോ പകലെന്നോ വ്യത്യാസമില്ലാതെ എല്ലാ കാലാവസ്ഥയിലും ശത്രു താവളങ്ങളും ആശയവിനിമയ കേന്ദ്രങ്ങളും തകർക്കാൻ ഇതിന് കഴിയും. രാഡാറുകളുടെ കണ്ണുവെട്ടിച്ച് അതിവേഗത്തിൽ സഞ്ചരിക്കാൻ സാധിക്കുന്നുവെന്നതാണ് ഇതിന്റെ പ്രധാന പ്രത്യേകതകളിലൊന്ന്.​സൈനിക സ്വയംപര്യാപ്തതയിലേക്കുള്ള ഇന്ത്യയുടെ മുന്നേറ്റത്തിൽ ഈ ബോംബിന്റെ വിജയം ഒരു നാഴികക്കല്ലാണ്. മറ്റ് വിദേശ രാജ്യങ്ങളിൽ നിന്നുള്ള അത്യാധുനിക ബോംബുകളെയും മിസൈലുകളെയും ആശ്രയിക്കുന്നത് കുറയ്ക്കാൻ ഇത് വ്യോമസേനയെ സഹായിക്കും. ഇന്ത്യൻ വ്യോമസേനയുടെ സുഖോയ് വിമാനങ്ങൾക്ക് പുറമെ മിറാഷ്, തേജ്സ് തുടങ്ങിയ മറ്റ് യുദ്ധവിമാനങ്ങളിലും ഈ ഗ്ലൈഡ് ബോംബ് ഘടിപ്പിച്ച് ഉപയോഗിക്കാനാകും. വരും ദിവസങ്ങളിൽ കൂടുതൽ പരീക്ഷണങ്ങൾ പൂർത്തിയാക്കി ഖഗന്തക്-243 ബോംബുകൾ വ്യോമസേനയുടെ ഭാഗമാക്കാനാണ് പ്രതിരോധ മന്ത്രാലയത്തിന്റെ തീരുമാനം.