റമദാൻ 2026; ഇന്ത്യയിൽ വ്രതാരംഭം ഫെബ്രുവരി 18-നോ 19-നോ? മാസപ്പിറവി നിരീക്ഷണം നിർണ്ണായകം
വിശുദ്ധ റമദാൻ മാസത്തെ വരവേൽക്കാൻ ഇന്ത്യയിലെ മുസ്ലിം വിശ്വാസികൾ ഒരുങ്ങുകയാണ്. 2026-ലെ വ്രതാനുഷ്ഠാനം എന്ന് ആരംഭിക്കുമെന്ന കാര്യത്തിൽ നിലവിൽ ചർച്ചകൾ സജീവമാണ്. ഫെബ്രുവരി 18-നോ അതോ 19-നോ ആദ്യ നോമ്പ് എന്നതിലാണ് പ്രധാനമായും സംശയങ്ങൾ നിലനിൽക്കുന്നത്. നിലവിലെ ജ്യോതിശാസ്ത്ര കണക്കുകൾ പ്രകാരം, ഫെബ്രുവരി 18-ന് വൈകുന്നേരം മാസപ്പിറവി ദൃശ്യമായാൽ ഫെബ്രുവരി 19 വ്യാഴാഴ്ച ഇന്ത്യയിൽ റമദാൻ വ്രതാരംഭം കുറിക്കാനാണ് കൂടുതൽ സാധ്യത.ഫെബ്രുവരി 17-ന് തന്നെ പുതിയ ചന്ദ്രൻ ഉദിക്കുമെങ്കിലും ഇസ്ലാമിക പാരമ്പര്യമനുസരിച്ച് മാസപ്പിറവി നേരിട്ട് ദൃശ്യമായാൽ മാത്രമേ വ്രതാരംഭം ഔദ്യോഗികമായി പ്രഖ്യാപിക്കൂ. ഡൽഹി, മുംബൈ തുടങ്ങിയ നഗരങ്ങളിലെ മതനേതൃത്വങ്ങൾ ഇതുവരെ അന്തിമ പ്രഖ്യാപനം നടത്തിയിട്ടില്ല. മാസപ്പിറവി കമ്മിറ്റികളുടെ തീരുമാനം അനുസരിച്ചായിരിക്കും ഔദ്യോഗിക തിയതി പുറത്തുവരിക.ഇന്ത്യയിൽ റമദാൻ മാസം ആരംഭിക്കുന്നത് പരമ്പരാഗതമായ ‘ഹിലാൽ’ (മാസപ്പിറവി) നിരീക്ഷണ രീതിയിലൂടെയാണ്. ശാബാൻ മാസം 29 പിന്നിടുന്ന വൈകുന്നേരം മഗ്രിബ് നമസ്കാരത്തിന് ശേഷം ആകാശത്ത് ചന്ദ്രനെ നിരീക്ഷിക്കും. ചന്ദ്രൻ ദൃശ്യമായാൽ തൊട്ടടുത്ത ദിവസം റമദാൻ ആരംഭിക്കും.അല്ലാത്തപക്ഷം ശാബാൻ 30 പൂർത്തിയാക്കി അടുത്ത ദിവസം വ്രതാരംഭത്തിലേക്ക് കടക്കും. കാലാവസ്ഥാ വ്യതിയാനങ്ങളും ഭൂമിശാസ്ത്രപരമായ പ്രത്യേകതകളും കാരണം വിവിധ രാജ്യങ്ങളിൽ വ്രതാരംഭം വ്യത്യസ്ത ദിവസങ്ങളിലാകാൻ സാധ്യതയുണ്ട്.ഇസ്ലാമിക് കലണ്ടർ അനുസരിച്ച് 29 അല്ലെങ്കിൽ 30 ദിവസമായിരിക്കും റമദാൻ മാസം നീണ്ടുനിൽക്കുക. 2026-ൽ റമദാൻ വ്രതം മാർച്ച് 19 അല്ലെങ്കിൽ 20-ഓടെ അവസാനിക്കുമെന്നാണ് കരുതപ്പെടുന്നത്.ഇതനുസരിച്ച് ചെറിയ പെരുന്നാൾ അഥവാ ഈദ് അൽ ഫിത്തർ മാർച്ച് 20-ന് ആഘോഷിക്കാനാണ് സാധ്യത. റമദാനിലെ അവസാന പത്തിലെ ലൈലത്തുൽ ഖദ്ർ ഉൾപ്പെടെയുള്ള പുണ്യരാത്രികൾക്കായി വിശ്വാസികൾ ഇതിനകം തയ്യാറെടുപ്പുകൾ തുടങ്ങിക്കഴിഞ്ഞു.ഇസ്ലാം മതത്തിലെ അഞ്ച് തൂണുകളിൽ ഒന്നാണ് റമദാൻ വ്രതം. ആത്മസംയമനം, ക്ഷമ, കാരുണ്യം, ആത്മീയമായ വളർച്ച എന്നിവയിലാണ് ഈ മാസം വിശ്വാസികൾ ശ്രദ്ധ കേന്ദ്രീകരിക്കുന്നത്. വ്രതത്തോടൊപ്പം തന്നെ പ്രാർത്ഥനകൾക്കും ഖുറാൻ പാരായണത്തിനും ദാനധർമ്മങ്ങൾക്കും (സക്കാത്ത് അൽ ഫിത്തർ) റമദാനിൽ വലിയ പ്രാധാന്യമുണ്ട്.പുലർച്ചെ സുബ്ഹിക്ക് മുമ്പുള്ള അത്താഴത്തോടെ (സഹർ) തുടങ്ങി വൈകുന്നേരം സൂര്യാസ്തമയത്തിന് ശേഷമുള്ള നോമ്പുതുറ (ഇഫ്താർ) വരെയാണ് വിശ്വാസികൾ അന്നപാനീയങ്ങൾ ഉപേക്ഷിച്ച് വ്രതം അനുഷ്ഠിക്കുന്നത്.
