കേരളത്തിലെ SIR നടപടികൾക്കെതിരെ മുസ്ലീംലീഗ് സുപ്രീം കോടതിയിൽ

SIR നടപടികൾ ഉടൻ നിർത്തിവെക്കണമെന്ന് ആവശ്യപ്പെട്ട് ഇന്ത്യൻ യൂണിയൻ മുസ്ലിം ലീഗ് (ഐ.യു.എം.എൽ) സുപ്രീം കോടതിയെ സമീപിച്ചു.പാർട്ടി ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടിയാണ് SIR കേരളത്തിലേക്ക് വ്യാപിപ്പിച്ച കേന്ദ്ര തിരഞ്ഞെടുപ്പ് കമ്മീഷൻ വിജ്ഞാപനത്തെ ചോദ്യം ചെയ്ത് ഹർജി നൽകിയത്.ബൂത്ത് ലെവൽ ഓഫീസറായ അനീഷ് ജോർജിൻ്റെ സമീപകാല ആത്മഹത്യയുടെ പശ്ചാത്തലത്തിലാണ് ഈ നീക്കമെന്ന് ഹർജിയിൽ പറയുന്നു. ഈ സംഭവങ്ങൾ റിവിഷൻ നടപടികളെ ചുറ്റിപ്പറ്റിയുള്ള സമ്മർദ്ദവും തിടുക്കവും എടുത്തു കാണിക്കുന്നുണ്ടെന്നും പാർട്ടി ചൂണ്ടിക്കാട്ടി.നവംബർ 4 മുതൽ ഡിസംബർ 4 വരെയായി നിശ്ചയിച്ചിട്ടുള്ള SIR-ൻ്റെ സമയക്രമവും ദൈർഘ്യവും “മറ്റ് ലക്ഷ്യങ്ങളോടെയുള്ളതാണ്” എന്നും ഇത് കേരളത്തിലെ തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പ് ഷെഡ്യൂളുമായി നേരിട്ട് ഓവർലാപ്പ് ചെയ്യുന്നതായും ഐ.യു.എം.എൽ വാദിക്കുന്നു.നവംബർ 11-നാണ് തദ്ദേശ തിരഞ്ഞെടുപ്പിനായുള്ള വിജ്ഞാപനം സംസ്ഥാന തിരഞ്ഞെടുപ്പ് കമ്മീഷൻ പുറത്തിറക്കിയത്.ഡിസംബർ 9, 11 തീയതികളിലായി രണ്ട് ഘട്ടങ്ങളിലായാണ് വോട്ടെടുപ്പ് നടക്കുന്നത്. വോട്ടെണ്ണൽ ഡിസംബർ 13-ന് നടക്കും. പെരുമാറ്റച്ചട്ടം ഇതിനോടകം നിലവിൽ വന്ന സാഹചര്യത്തിൽ, SIR ഒരേസമയം നടത്തുന്നത് ഭരണഘടനാ വ്യവസ്ഥകളുടെ ലംഘനമാണെന്നും തിരഞ്ഞെടുപ്പ് പ്രക്രിയയെ തടസ്സപ്പെടുത്തുമെന്നും ഐ.യു.എം.എൽ ആരോപിച്ചു.കേരളത്തിലേക്ക് SIR വ്യാപിപ്പിച്ചുകൊണ്ടുള്ള തിരഞ്ഞെടുപ്പ് കമ്മീഷൻ്റെ വിജ്ഞാപനം സ്റ്റേ ചെയ്യുന്നതിനുള്ള നിർദ്ദേശം ഉൾപ്പെടെ ഇടക്കാല ആശ്വാസമാണ് ഹർജിയിൽ ആവശ്യപ്പെടുന്നത്.