നിയന്ത്രണംവിട്ട കാറിടിച്ച് രണ്ടുപേർക്ക് പരിക്ക്

പാറശ്ശാല : ഡ്രൈവർ ഉറങ്ങിയതിനെത്തുടർന്ന് നിയന്ത്രണംവിട്ട കാറിടിച്ച് രണ്ടുപേർക്ക് പരിക്കേറ്റു. സംസ്ഥാന അതിർത്തിയായ ഇഞ്ചിവിള കവലയിലാണ് ഞായറാഴ്ച ഉച്ചയ്ക്ക് പന്ത്രണ്ടുമണിയോടെ അപകടമുണ്ടായത്.കളിയിക്കാവിള ഭാഗത്തുനിന്ന് പാറശ്ശാലയിലേക്ക് വരുകയായിരുന്ന കാർ നിയന്ത്രണം വിടുകയായിരുന്നു. റോഡരികിലെ കടയിൽ സാധനം വാങ്ങാനായി നിന്ന ആലമ്പാറ സ്വദേശികളായ ഷാജി (43), അഭിജ (13) എന്നിവരെ ഇടിച്ചുതെറിപ്പിക്കുകയായിരുന്നു.പരിക്കേറ്റ രണ്ടുപേരെയും നാട്ടുകാർ കാറിന്റെ അടിയിൽനിന്ന് പുറത്തെടുക്കുകയായിരുന്നു. ഇവർക്ക് പാറശ്ശാല താലൂക്ക് ആശുപത്രിയിൽ പ്രാഥമിക ചികിത്സ നൽകിയശേഷം വിദഗ്ധ ചികിത്സയ്ക്കായി തിരുവനന്തപുരം മെഡിക്കൽ കോളേജിലേക്കു മാറ്റി. ഉറങ്ങിപ്പോയതാണ് അപകടത്തിന് കാരണമായതെന്ന് വാഹനത്തിന്റെ ഡ്രൈവർ പറഞ്ഞു.