ഇന്ത്യയില്‍ സിക വൈറസ്; സ്ഥിതീകരിച്ചു

മഹാരാഷ്ട്രയിലെ പൂനെയില്‍ 46 കാരനായ ഡോക്ടറിനും അദ്ദേഹത്തിന്റെ 15-കാരിയായ മകള്‍ക്കും സിക വൈറസ് അണുബാധ സ്ഥിരീകരിച്ചു. നിലവില്‍ അവരുടെ ആരോഗ്യനില തൃപ്തികരമാണെന്ന് അധികൃതര്‍ അറിയിച്ചു. പനി, ചുണങ്ങ് തുടങ്ങിയ രോഗലക്ഷണങ്ങള്‍ കണ്ടതോടെ ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു. അദ്ദേഹത്തിന്റെ രക്ത സാമ്പിളുകള്‍ നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയിലേക്ക് (എന്‍ഐവി) പരിശോധനയ്ക്കായി അയച്ചു. ജൂണ്‍ 21 ന്, അദ്ദേഹത്തിന്റെ റിപ്പോര്‍ട്ടുകള്‍ സിക വൈറസ് അണുബാധ പോസിറ്റീവാണെന്ന് സ്ഥിരീകരിച്ചതായി പൂനെ മുനിസിപ്പല്‍ കോര്‍പ്പറേഷന്റെ (പിഎംസി) ആരോഗ്യ ഉദ്യോഗസ്ഥന്‍ വ്യക്തമാക്കി.‘അദ്ദേഹം പോസിറ്റീവായ ശേഷം, അദ്ദേഹത്തിന്റെ അഞ്ച് കുടുംബാംഗങ്ങളുടെ രക്ത സാമ്പിളുകള്‍ ശേഖരിച്ച് വിശകലനത്തിനായി അയച്ചു, ഇതില്‍ 15 വയസ്സുള്ള മകള്‍ക്കും രോഗബാധയുണ്ടെന്ന് കണ്ടെത്തി,’ ഉദ്യോഗസ്ഥര്‍ കൂട്ടിച്ചേര്‍ത്തു.ഡെങ്കിപ്പനി, ചിക്കുന്‍ഗുനിയ തുടങ്ങിയ അണുബാധകള്‍ പരത്തുന്ന ഈഡിസ് കൊതുകിലൂടെയാണ് സിക വൈറസ് രോഗം പകരുന്നത്. 1947ല്‍ ഉഗാണ്ടയിലാണ് ഈ വൈറസ് ആദ്യമായി കണ്ടെത്തിയത്. ഈ രണ്ട് കേസുകളും നഗരത്തില്‍ റിപ്പോര്‍ട്ട് ചെയ്തതിന് ശേഷം, പിഎംസിയുടെ ആരോഗ്യ വകുപ്പ് നിരീക്ഷണം ആരംഭിച്ചതായി ഉദ്യോഗസ്ഥര്‍ പറഞ്ഞു.പ്രദേശത്ത് മറ്റ് സംശയാസ്പദമായ കേസുകളൊന്നും കണ്ടെത്തിയിട്ടില്ലെങ്കിലും, കൊതുകുകള്‍ പെരുകുന്നത് തടയാന്‍ അധികൃതര്‍ ഫോഗിംഗ്, ഫ്യൂമിഗേഷന്‍ തുടങ്ങിയ മുന്‍കരുതല്‍ നടപടികള്‍ ആരംഭിച്ചതായി അദ്ദേഹം പറഞ്ഞു.‘സംസ്ഥാന ആരോഗ്യവകുപ്പ് കൊതുക് സാമ്പിളുകള്‍ ശേഖരിച്ചിട്ടുണ്ട്. ഞങ്ങള്‍ പ്രദേശത്ത് പൊതുജന ബോധവല്‍ക്കരണം ആരംഭിക്കുകയും പ്രദേശത്തെ ഗര്‍ഭിണികളുടെ ആരോഗ്യം നിരീക്ഷിക്കാന്‍ നിര്‍ദ്ദേശങ്ങള്‍ നല്‍കുകയും ചെയ്തിട്ടുണ്ട്. സിക പൊതുവെ ഗുരുതരമായ സങ്കീര്‍ണതകളിലേക്ക് നയിക്കുന്നില്ല, പക്ഷേ സാഹചര്യത്തില്‍. ഗര്‍ഭിണിയായ സ്ത്രീക്ക് രോഗം ബാധിച്ചാല്‍ അത് ഗര്ഭപിണ്ഡത്തില്‍ മൈക്രോസെഫാലിക്ക് കാരണമാകും,’ അദ്ദേഹം പറഞ്ഞു.