പോലീസ് ജീപ്പും ബൈക്കും കൂട്ടിയിടിച്ച് യുവാവ് മരിച്ചു
ആലപ്പുഴ: തകഴിയില്‍ പോലീസ് ജീപ്പും ബൈക്കും കൂട്ടിയിടിച്ച് യുവാവ് മരിച്ചു. എടത്വ സ്വദേശി സാനി ബേബിയാണ് മരിച്ചത്. അമ്പലപ്പുഴ- തിരുവല്ല റോഡില്‍ വ്യാഴാഴ്ച രാത്രി എട്ടരയോടെയാണ് സംഭവം. ഇന്ധനം നിറച്ചശേഷം മടങ്ങുകയായിരുന്ന ആലപ്പുഴ സൗത്ത് സ്റ്റേഷനിലെ പോലീസ് ജീപ്പും യുവാവ് സഞ്ചരിച്ചിരുന്ന ബൈക്കുമാണ് അപകടത്തില്‍പ്പെട്ടത്. യുവാവിനെ ഉടന്‍ വണ്ടാനം മെഡിക്കല്‍ കോളേജില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അതേസമയം അപകടകാരണം എന്താണെന്ന് വ്യക്തമല്ല. പ്രദേശത്തെ സിസിടിവി ദൃശ്യങ്ങള്‍ ഉള്‍പ്പെടെ പോലീസ് ശേഖരിക്കുന്നുണ്ട്. കൂടുതല്‍ വിവരങ്ങള്‍ ലഭ്യമായിട്ടില്ല.
