പോലീസിനു നേരെ കത്തി വീശി പരാക്രമം; പ്രതി അറസ്റ്റിൽ

തൃശൂർ: പോലീസിനുനേരെ കത്തി വീശി ഗുണ്ടയുടെ പരാക്രമം. പുത്തൻ പീടികയിൽ കള്ള് ഷാപ്പിന് മുന്നിൽ വെങ്കിടങ്ങ് പാടൂർ കുണ്ടഴിയൂർ സ്വദേശി സിയാദ് ആണ് പരാക്രമം കാണിച്ചത്. കസ്റ്റഡിയിലെടുക്കാൻ പോലീസ് വന്നപ്പോൾ ഇയാൾ കത്തി വീശുകയായിരുന്നു. പോലീസ് ജീപ്പിൽ കയറാൻ ആവശ്യപ്പെട്ടപ്പോഴാണ് ഇയാൾ കത്തി വീശിയത്. കത്തി മാറ്റാൻ നിരവധി തവണ പോലീസ് സംഘം ആവശ്യപ്പെട്ടു. പോലീസ് ജീപ്പിൽ കയറില്ലെന്നും വണ്ടി തല്ലിപ്പൊളിക്കുമെന്നും ഇയാൾ ഭീഷണിപ്പെടുത്തി. ഇയാളെ പിന്നീട് പോലീസ് കസ്റ്റഡിയിലെടുത്തു. 32 ക്രിമിനൽ കേസുകളിലെ പ്രതിയാണ് ഇയാളെന്ന് പോലീസ് പറഞ്ഞു.