29, 30 തീയതികളില്‍ മഴയും കാറ്റും വർധിക്കും, പ്രത്യേക ജാഗ്രത വേണം; സംസ്ഥാനത്ത് നാലായിരത്തോളം ക്യാമ്പുകൾ സജ്ജമെന്നും മന്ത്രി കെ രാജൻ
മെയ് 29, 30 തീയതികളില്‍ മഴയും കാറ്റും വർധിക്കുമെന്നും ഈ ദിവസങ്ങളില്‍ പ്രത്യേക ജാഗ്രത പുലര്‍ത്തണമെന്നും മന്ത്രി കെ രാജൻ. ഒരു ന്യൂനമർദപാത്തി കൂടി രൂപപ്പെടുന്നതോടെ നാലഞ്ച് ദിവസം മഴയും കാറ്റും തുടരും. സംസ്ഥാനത്ത് പരക്കെ മഴ കിട്ടിയിട്ടുണ്ട്. 586 വീടുകള്‍ ഭാഗികമായും 21 വീടുകള്‍ പൂര്‍ണമായും തകര്‍ന്നുവെന്നാണ് പ്രാഥമിക കണക്കെന്നും അദ്ദേഹം പറഞ്ഞു.
സംസ്ഥാനത്ത് 4000ത്തോളം ക്യാമ്പുകള്‍ സജ്ജമാക്കിയിട്ടുണ്ട്. നിലവില്‍ 16 ക്യാമ്പില്‍ 467 ആളുകളുണ്ട്. മഴക്കെടുതി നേരിടാൻ സംസ്ഥാനം ആകെയും സജ്ജമാണ്. ജാഗ്രത വേണം. തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ നല്ല രീതിയില്‍ പ്രവര്‍ത്തനം നടക്കുന്നുണ്ട്. ഏറ്റവും കൂടുതല്‍ നഷ്ടമുണ്ടായത് വൈദ്യുതി വകുപ്പിനാണ്.
ഡാമുകളില്‍ നിലവില്‍ എവിടേയും അപകടമില്ല. രാത്രികാലങ്ങളില്‍ ഒരു സാഹചര്യത്തിലും ഡാം തുറക്കില്ല. മലയോര മേഖലയില്‍ ഇന്ന് രാവിലെ എട്ടു മണി വരെ ശരാശരി 500 എം എം മഴ ലഭിച്ചിട്ടുണ്ട്. മലയോര മേഖലയിലുള്ള രാത്രിയാത്രയില്‍ ജാഗ്രത പുലര്‍ത്തണമെന്നും മന്ത്രി കെ രാജൻ പറഞ്ഞു.
