ബോണക്കാട്ട് വീണ്ടും കരടിയുടെ ആക്രമണം

നെടുമങ്ങാട് : കരടിയുടെ ആക്രമണത്തിൽ തോട്ടം തൊഴിലാളിക്കു ഗുരുതരമായി പരിക്കേറ്റു. ബോണക്കാട് ബി.എ. ഡിവിഷനിൽ കാറ്റാടിമുക്ക് ലെയ്‌നിലെ ലാലനെ(55)യാണ് വ്യാഴാഴ്ച പുലർച്ചെ വീടിനുമുന്നിൽവെച്ച് കരടി ആക്രമിച്ചത്.രണ്ടു കരടികൾ ഉണ്ടായിരുന്നതായി നാട്ടുകാർ പറയുന്നു. വീടിന്റെ മുറ്റത്തേക്കിറങ്ങുമ്പോൾ കരടി പിന്നിൽനിന്ന് ആക്രമിക്കുകയായിരുന്നു. ആദ്യത്തെ ശക്തമായ അടിയിൽത്തന്നെ ലാലൻ നിലത്തുവീണു. തുടർന്ന് ഇയാളെ കരടി വീണ്ടും ആക്രമിച്ചു. തുടകളിലും കൈകളിലും ആഴത്തിൽ മുറിവേറ്റു. ലാലന്റെ നിലവിളികേട്ടെത്തിയ സമീപവാസികൾ ബഹളം െവച്ചപ്പോൾ കരടികൾ ഓടിപ്പോയി. ഗുരുതരമായി പരിക്കേറ്റ ലാലനെ വിതുര താലൂക്ക് ആശുപത്രിയിലും പിന്നീട് മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.മാസങ്ങൾക്കു മുൻപ്‌ ആനപ്പാറ തച്ചരുകാല തെക്കുംകര പുത്തൻവീട്ടിൽ ശിവദാസൻ കാണിയെ കരടി ആക്രമിച്ചിരുന്നു. കൂലിപ്പണിക്കാരനായ ശിവദാസൻ കാണി ജോലിക്കു പോകാനിറങ്ങിയപ്പോഴായിരുന്നു ആക്രമണം. അടുത്തുനിന്ന കമുകിൽ കയറി രക്ഷപ്പെടാൻ ശ്രമിച്ചെങ്കിലും പിന്നാലെയെത്തിയ കരടി ശിവദാസൻകാണിയെ വലിച്ചുതാഴെയിട്ടശേഷം ആക്രമിക്കുകയായിരുന്നു.