നവകേരള സദസിനായി മുഖ്യമന്ത്രിയും മറ്റു മന്ത്രിമാരുമെത്തിയ ബസ് മാനന്തവാടിയിൽ ചെളിയിൽ താഴ്‌ന്നു
മാനന്തവാടി: നവകേരള സദസിനായി മുഖ്യമന്ത്രിയും മറ്റു മന്ത്രിമാരുമെത്തിയ ബസ് മാനന്തവാടിയിൽ ചെളിയിൽ താഴ്‌ന്നു. കൽപ്പറ്റയിലും ബത്തേരിയിലും നടന്ന നവകേരള സദസിനുശേഷം വയനാട്ടിലെ അവസാനത്തെ പരിപാടിയായിരുന്നു മാനന്തവാടിയിലേത്. സുൽത്താൻബത്തേരിയിൽനിന്ന് അഞ്ചരയോടെയാണ് മുഖ്യമന്ത്രിയും മന്ത്രിമാരും ഉൾപ്പെടെയുള്ള സംഘം മാനന്തവാടിയിലെത്തിയത്. ജനത്തെ നിയന്ത്രിക്കാനായി കെട്ടിയ ബാരിക്കേഡിനിടയിലൂടെ ബസ് സ്റ്റേജിന്‍റെ അടുത്തുകൊണ്ടുവരാനായിരുന്നു ആദ്യ ശ്രമം. ബാരിക്കേഡ് കടക്കാൻ ശ്രമിച്ചപ്പോൾ ചെളിയിൽ ടയറുകൾ കറങ്ങി ബസ് നിന്നു .ഒആർ കേളു എംഎൽഎ, കളക്ടർ ഡോ. രേണുരാജ് ഉൾപ്പെടെയുള്ളവർ ഇവിടെയെത്തിയാണ് മുഖ്യമന്ത്രിയെയും മന്ത്രിമാരെയും സ്വീകരിച്ചത്. ബസിന്‍റെ മുൻടയറുകളും പിൻടയറുകളും ചെളിയിൽ താഴ്‌ന്നുപോയി. പോലീസ് ഉദ്യോഗസ്ഥരും കമാൻഡോകളും തള്ളിയാണ് ഒടുവിൽ ബസിനെ ചെളിയിൽനിന്ന് കര കയറ്റിയത്. പിൻ ടയറുകൾ നല്ലരീതിയിൽ താഴ്‌ന്നുപോയതിനാൽ കയർ കെട്ടി വലിക്കേണ്ടിയും വന്നു. ചെളിയിൽനിന്ന് കരകയറ്റിയശേഷം ബസ് പ്രധാന റോഡിലേക്ക് മാറ്റിയിട്ടു.നവകേരള സദസ് കഴിഞ്ഞശേഷം മുഖ്യമന്ത്രിയെയും മറ്റു മന്ത്രിമാരെയും മറ്റൊരു വാഹനത്തിലാണ് ബസ് നിർത്തിയിട്ട സ്ഥലത്തേക്ക് എത്തിച്ചത്. മന്ത്രിമാരായ പിഎ മുഹമ്മദ് റിയാസ്, ആന്‍റണി രാജു, റോഷി അഗസ്റ്റിൻ എന്നിവർ നടന്നും ബസിനരികിലെത്തി. ബുധനാഴ്ച രാത്രിയും വ്യാഴാഴ്ച രാവിലെയും പെയ്ത കനത്ത മഴയാണ് പ്രശ്നമായത്. മഴ കാരണം വെള്ളക്കെട്ട് രൂപപ്പെട്ടതിനാൽ പരാതി സ്വീകരിക്കുന്ന സ്ഥലവും മറ്റൊരിടത്തേക്ക് മാറ്റിയിരുന്നു.ഒല്ലൂര്‍ നവകേരള സദസ്സിനോടനുബന്ധിച്ച് നടത്തറ ഗ്രാമപഞ്ചായത്തില്‍ ഇന്ന് (നവംബര്‍ 24) വൈകിട്ട് നാലിന് മെഗാ തിരുവാതിര നടക്കും. കുടുംബശ്രീയുടെ നേതൃത്വത്തില്‍ മൂര്‍ക്കനിക്കര ജി യു പി എസിലാണ് 200 ഓളം പേര്‍ പങ്കെടുക്കുന്ന തിരുവാതിര അരങ്ങേറുക.ഒല്ലൂര്‍ നവകേരള സദസിന്റെ പ്രചാരണാര്‍ഥം സംഘടിപ്പിക്കുന്ന തിരുവാതിരയില്‍ കുടുംബശ്രീ പ്രവര്‍ത്തകര്‍ക്ക് പുറമേ ഗ്രാമപഞ്ചായത്ത് അംഗങ്ങള്‍, ആശാവര്‍ക്കര്‍മാര്‍, അംഗനവാടി ജീവനക്കാര്‍ പഞ്ചായത്ത് ജീവനക്കാര്‍ തുടങ്ങിയവര്‍ പങ്കെടുക്കും. നടത്തറ ഗ്രാമപഞ്ചായത്ത് പ്രസിഡന്റ് ശ്രീവിദ്യ രാജേഷ്, വൈസ് പ്രസിഡന്റ് പി ആര്‍ രജിത്ത്, സിഡിഎസ് ചെയര്‍പേഴ്‌സണ്‍ ജിജ ജയന്‍, വൈസ് ചെയര്‍പേഴ്‌സണ്‍ ശാലിനി സുനില്‍കുമാര്‍ എന്നിവരുടെ നേതൃത്വത്തിലാണ് മെഗാ തിരുവാതിര ഒരുങ്ങുന്നത്.
