സിവിൽ സർവ്വീസ് സംരക്ഷണ യാത്ര

നെയ്യാറ്റിൻകര : ‘പെൻഷൻ നമ്മുടെ അവകാശം, സിവിൽ സർവ്വീസ് നാടിന് അനിവാര്യം, അഴിമതി നാടിന് അപമാനം ‘എന്നീ മുദ്രാവാക്യങ്ങൾ ഉയർത്തി ജോയിന്റ് കൗൺസിലിന്റെ നേതൃത്വത്തിൽ നവംബർ ഒന്നിന് കാസർഗോഡ് നിന്നാരംഭിച്ച് ഡിസംബർ ഏഴിന് തിരുവനന്തപുരത്ത് സമാപിക്കുന്ന “സിവിൽ സർവ്വീസ് സംരക്ഷണ യാത്ര” ഇന്ന് (ചൊവ്വ) നെയ്യാറ്റിൻകരയിൽ എത്തിച്ചേരും. നെയ്യാറ്റിൻകര ബസ് സ്റ്റാന്റ് പരിസരത്ത് വൈകുന്നേരം നാലര മണിക്ക് നടക്കുന്ന തിരുവനന്തപുരം സൗത്ത് ജില്ലാതല കാൽനട ജാഥ പര്യടനത്തിന്റെ സമാപനം സിപിഐ നേതാവ് പന്ന്യൻ രവീന്ദ്രൻ ഉദ്ഘാടനം ചെയ്യും. സംഘാടക സമിതി ചെയർമാൻ ജി.എൻ ശ്രീകുമാരൻ അധ്യക്ഷത വഹിക്കും. തിരുവനന്തപുരം സൗത്ത് ജില്ലയിലെ പര്യടനത്തിന്റെ രണ്ടാം ദിവസത്തെ പ്രയാണം ഇന്ന് (ചൊവ്വ) രാവിലെ 10 മണിക്ക് കാട്ടാക്കട ബസ്റ്റാന്റ് പരിസരത്ത് നിന്ന് ആരംഭിക്കും. സിപിഐ ജില്ലാ സെക്രട്ടറി മാങ്കോട് രാധാകൃഷ്ണൻ ഉദ്ഘാടനം ചെയ്യും. സംഘാടകസമിതി ചെയർമാൻ എസ്. ചന്ദ്രബാബു അധ്യക്ഷത വഹിക്കും. ജോയിന്റ് കൗൺസിൽ ചെയർമാൻ കെ.ഷാനവാസ് ഖാൻ, ജനറൽ സെക്രട്ടറി ജയശ്ചന്ദ്രൻ കല്ലിംഗൽ എന്നിവർ ക്യാപ്റ്റൻ മാരും, വൈസ് ചെയർമാൻമാരായ കെ. മുകുന്ദൻ, എം.എസ് സുഗൈതകുമാരി എന്നിവർ വൈസ് ക്യാപ്റ്റൻമാരും, ട്രഷറർ കെ.പി ഗോപകുമാർ ജാഥ മാനേജരുമായ കാൽനട ജാഥ തൂങ്ങാംപാറ, അരുമാളൂർ,കണ്ടല വഴി ഉച്ചയ്ക്ക് പന്ത്രണ്ട് മണിക്ക് പോങ്ങുംമൂട് ജംഗ്ഷനിൽ എത്തുമ്പോൾ വർഗ്ഗ ബഹുജന സംഘടനകളുടെ നേതൃത്വത്തിൽ സ്വീകരണം നൽകും. വണ്ടന്നൂർ, പെരുമ്പഴുതൂർ വഴി നെയ്യാറ്റിൻകര ബസ്റ്റാൻഡ് പരിസരത്ത് കാൽനട ജാഥ യുടെ സൗത്ത് ജില്ലാതല പര്യടനം പൂർത്തിയാകും. ജോയിന്റ് കൗൺസിൽ ‘നന്മ സാംസ്കാരിക വേദി’യിലെ കലാകാരന്മാർ വിവിധ സ്വീകരണ കേന്ദ്രങ്ങളിൽ ‘വെയിൽ കൊള്ളുന്നവർ” എന്ന തെരുവുനാടകം അവതരിപ്പിക്കും. ജാഥ കടന്നുപോകുന്ന പ്രധാന ഇടങ്ങളിൽ ജാഥാംഗങ്ങൾ “ഓർമ്മ മരം” നടും. തിരുവനന്തപുരം സൗത്ത് ജില്ലാതല പര്യടനം പൂർത്തിയാക്കുന്ന കാൽനട ജാഥ ഡിസംബർ ഏഴിന് തിരുവനന്തപുരം പുത്തരിക്കണ്ടം ഇ.കെ നായനാർ പാർക്കിൽ സമാപിക്കും.