ട്രെയിനില്‍ കടത്തിക്കൊണ്ട് വന്ന കഞ്ചാവ് പിടികൂടി
തിരുവനന്തപുരം ചെന്നൈ എഗ്‌മോറില്‍ നിന്ന് കൊല്ലത്തേക്ക് പോവുകയായിരുന്ന അനന്തപുരി എക്സ്പ്രസ് ട്രെയിനില്‍ തിരുവനന്തപുരത്ത് വന്നിറങ്ങിയ യാത്രക്കാരില്‍ നിന്ന് 13 കിലോ കഞ്ചാവ് പിടികൂടി. ബീമാപള്ളി സ്വദേശി അനസ് എന്നയാളുടെ സഹോദരന്മാര്‍ ട്രെയിനില്‍ കഞ്ചാവ് കടത്തുന്നു എന്ന രഹസ്യ വിവരത്തെത്തുടര്‍ന്ന് എക്‌സൈസ് നടത്തിയ പരിശോധനയിലാണ് കഞ്ചാവ് പിടികൂടിയത്. ബീമാപള്ളി സ്വദേശികളായ അന്‍സാരി, ഷെറീഫ്, ഷജീര്‍, ബാലരാമപുരം വഴിമുക്ക് സ്വദേശി ഫൈസല്‍ എന്നിവരാണ് അറസ്റ്റിലായത്.സ്റ്റേറ്റ് എക്‌സൈസ് എന്‍ഫോഴ്‌സ്‌മെന്റ് സ്‌ക്വാഡ് അസിസ്റ്റന്റ് കമ്മീഷണര്‍ ടി.അനികുമാര്‍ നല്‍കിയ വിവരത്തിന്റെ അടിസ്ഥാനത്തില്‍ തിരുവനന്തപുരം സിറ്റി ഇന്‍സ്‌പെക്ടര്‍ വി.ജി സുനില്‍കുമാറിന്റെ നേതൃത്വത്തിലുള്ള എക്‌സൈസ് സംഘമാണ്പ്രതികളെ പിടികൂടിയത്. ട്രെയിനില്‍ വന്നിറങ്ങിയ നാല് പേരെ പിടികൂടിയത്. ട്രെയിനില്‍ നിന്നിറങ്ങിയ പ്രതികള്‍ നാലുപേരും പവര്‍ഹൗസ് റോഡിലെത്തി ഓട്ടോറിക്ഷയില്‍ കയറാനൊരുങ്ങുമ്പോഴാണ് എക്‌സൈസ് സംഘത്തിന്റെ പിടിയിലായത്.
